Доўгачаканы надыход зімы абудзіў вясёлай гаманой пляцоўку перад будынкам філіяла Чэрвеньскай спецыялізаванай дзіцяча-юнацкай школы алімпійскага рэзерву ў Смілавічах.
Другі сезон тут працуе каток. Нягледзячы на тое, што пляцоўка невялікая, на ёй заўсёды шматлюдна. На канькі з задавальненнем становяцца не толькі дзеці, але і іх бацькі.
— Сёлета з-за няўстойлівага надвор’я заліць лёд было не так проста, але мы справіліся, — распавядае выконваючая абавязкі загадчыка філіяла Марына Салаўчук. — Смілаўчане засумавалі па снегу і марозу, таму з першых дзён працы да катка — павышаная цікаўнасць. Напрыклад, толькі за мінулую пятніцу сюды завітала больш за сто чалавек. Акрамя ўтульнасці і музычнага суправаджэння, наш каток вабіць наведвальнікаў тым, што за невялікую плату мы прапаноўваем ім канькі напракат. Гэтая паслуга карыстаецца трывалым попытам.
Ігар АДАМОВІЧ