59 гадоў мінула з тае пары, як выйшла пастанова Савета Міністраў СССР аб стварэнні пазаведамаснай аховы. Аб тым, якімі справамі поўніліся сёлета будні Чэрвеньскага аддзялення Дэпартамента аховы, распавядае яго начальнік маёр міліцыі Сяргей ЕРМАЛОВІЧ:
— Асноўны паказчык, па якому ацэньваецца наша работа -недапушчэнне крадзяжоў з ахоўваемых аб’ектаў. Цяпер пад пультавым кантролем у нас знаходзіцца 103 аб’екты, у асноўным, райспажыўтаварыства. У дадатак да ахоўнай сігналізацыі ёсць і трывожныя кнопкі ( іх у нас — 68) для экстранага выкліку міліцыі. Кантроль за станам такіх сродкаў сігналізацыі — адзін з накірункаў нашай дзейнасці. Дарэчы, па прычыне спрацоўкі кнопкі ў гэтым годзе было адзначана 57 выездаў. 21 з іх меў сур’ёзныя падставы і завяршыўся затрыманнем правапарушальніка.
Безумоўна, якімі б дасканалымі не былі сучасныя ахоўныя сістэмы, ёсць шэраг аб’ектаў, дзе неабходна кругласутачная прысутнасць чалавека. Яе ажыццяўляюць вартаўнікі, ахоўнікі і міліцыя. Сёння у нас адзінаццаць такіх пастоў. У райцэнтры — райвыканкам, бальніца, міні-рынак, суд і сушыльны завод, у раёне — пост на воданапорнай станцыі ў Рудні, у Смілавічах — скурзавод і міні-рынак. У гэтым годзе ўзяты пад ахову яшчэ два аб»екты — «Вёска-ЭмульБіт» і аздараўленчы цэнтр «Волма» .
Павялічваецца і колькасць узятых пад ахову памяшканняў з асабістай маёмасцю грамадзян. Гэта — кватэры, дамы, дачы, гаражы. Сёлета прыборамі сігналізацыі абсталявана 21 кватэра. А ўсяго 235 такіх аб’ектаў. У гэтым годзе не было ніводнай нават спробы спакусіцца на маёмасць, што знаходзіцца пад нашай аховай, а вось затрыманне злодзея ў адным з прыватных гаражоў — мела месца. Імгненна на гэты выпадак адрэагавалі міліцыянер-кінолаг старшы прапаршчык міліцыі Уладзімір РАБЦЭВІЧ і міліцыянер-вадзіцель сержант міліцыі Павел ЯКУБОЎСКІ. Яны на месцы злачынства затрымалі зланамысніка, які затым падчас следства прызнаўся яшчэ ў пяці крадзяжах з прыватных гаражоў райцэнтра.
Нашы супрацоўнікі вызначаюцца не толькі сваімі прафесійнымі дасягненнямі. Яны — і добрыя артысты, і спартсмены. Нядаўна на конкурсе мастацкай самадзейнасці сярод аддзяленняў Дэпартамента аховы Мінскай вобласці вартаўнік Міхаіл ШЧЭРБАЧ і тэхнічны работнік Уладзімір КРАМАРЧУК атрымалі Дыплом першай ступені. На абласных спаборніцтвах па барацьбе самба ў вагавай катэгорыі да ста кілаграмаў першае месца заняў прапаршчык страявога падраздзялення міліцыянер Вячаслаў БАРАВІК. А будні і святы штодзённага жыцця Дэпартамента аховы нашлі адлюстраванне ў своеасаблівым музеі гісторыі аддзялення, які стварылі нашы супрацоўнікі. Адкрыццё яго прымеркавалі да прафесійнага свята.
Віншую ўсіх цяперашніх работнікаў, ветэранаў службы аховы. Шчыра дзякую за добрасумленную службу. Здароўя, шчасця, дабрабыту вам і вашым сем’ям.
