Паводле звестак райсельгасхарчу, сёлета азімы рапс на зерне займае на палетках сельгаспрадпрыемстваў Чэрвеньшчыны 3644 гектары. Таксама неабходна абмалаціць 21283 гектараў збажыны без уліку кукурузы, грэчкі і проса.
Важнае значэнне падчас жніва будзе мець надзейная праца тэхнікі. Як распавёў “Раённаму весніку” начальнік раённай інспекцыі Дзяржтэхнагляду Сяргей Коваль, на пачатак тыдня з 68 камбайнаў, якія плануецца задзейнічаць ва ўборцы ўраджаю, былі адрамантаваныя 65. З іх атрымалі допуск да працы ў полі 52, на астатніх завяршаецца ўкамплектаванне ўсім неабходным і герметызацыя агрэгатаў. Тры камбайны пакуль няспраўныя. Адзін з іх мяркуецца спісаць, два павінны быць адрамантаваныя бліжэйшымі днямі.
Сяргей Коваль адзначыў, што сёлета гаспадаркі пачалі падрыхтоўку збожжаўборачнай тэхнікі да жніва пазней, чым звычайна. Звязана гэта з тым, што з-за неспрыяльнага надвор’я запазнілася корманарыхтоўка: механізатары, за якімі замацаваныя камбайны, былі занятыя ёй. Аднак рамонтныя работы ўдалося правесці ў сціслыя тэрміны. Былі праблемы з запчасткамі: некаторыя з іх, на імпартную тэхніку, даводзіліся заказваць за мяжой. Хтосьці з-за фінансавых цяжкасцяў набываў неабходныя вузлы і механізмы авансам за будучы ўраджай або ў пазыку, але абышліся без бюджэтнай падтрымкі.
Дапрацоўку збожжа ў гаспадарках будуць забяспечваць 14 зернесушыльных комплексаў. Усе яны гатовыя па працы. Тэхнікі для адвозкі збожжа ад камбайнаў у сельгаспрадпрыемстваў дастаткова. А для яго пастаўкі на хлебапрыёмныя пункты ў лік дзяржзаказу будзе задзейнічаны грузавы транспарт аўтапарка №20.
Паводле слоў Сяргея Коваля, зыходзячы з цяперашняга надвор’я, можна прагназаваць, што масавае жніво пачнецца ў раёне прыкладна праз два тыдні. Пры гэтым, хутчэй за ўсё, як і ў мінулым годзе, рапс і зерневыя давядзецца ўбіраць адначасова. І яшчэ да завяршэння абмалоту збажыны надыдуць спрыяльныя агратэхнічныя тэрміны для сяўбы азімага рапсу. Гаспадаркі рыхтуюцца да такой сітуацыі ўжо зараз: распрацаваныя рабочыя планы па аператыўнай уборцы і звозцы саломы, ворыву глебы.
