Летась гэтую культуру пасеялі тут у якасці эксперыменту і атрымалі неблагі вынік – 30 цэнтнераў з гектара.
Паколькі азімы ячмень зараз у цэнтры ўсеагульнай увагі, я патэлефанаваў у гаспадарку і разам з аграномам Ілонай Бурай выправіўся ў поле.
Палетак за вёскай Майзарова сустрэў мерным гулам тэхнікі і водарам спелай збажыны. Палову ячменю ўжо прыбралі, а на другой сцяною стаялі спелыя бурштынавыя каласы.
– Сыпле пад трыццаць цэнтнераў з гектара, – выціраючы пот з ілба, усміхаецца камбайнер Андрэй Крыцкі. – Пасевы роўныя, чысцюткія: убіраць адно задавальненне. Настрой добры, прыемна пачынаць сезон на ўраджайным полі. Рухаемся на камбайнах павольна, каб ніводнае зярнятка не згубіць.
Ілона Бурая таксама задаволеная вынікамі эксперыменту.
– Заўсёды хочацца паспрабаваць штосьці новае, – кажа яна. – Калі задумалі заняцца азімым ячменем, сумненні, канешне ж, былі. У адрозненне ад іншых зерневых, якія сеюць увосень, у яго вузел кушчэння знаходзіцца не ў глебе, а на паверхні. Таму ёсць рызыка, што пасевы пашкодзіць мароз. Але зімы ў нас зараз даволі мяккія, і мінулую ячмень беларускай селекцыі гатунку “Бажант“, які мы пасеялі дзеля эксперыменту на пяцідзесяці гектарах, перажыў без праблем. Догляд быў самым звычайным: увесну падкармілі, правялі хімпраполку.
Таксама нас палохалі, што нібыта азімы ячмень з-за павышанай асцюкаватасці будзе дрэнна высыпацца з бункера камбайна. Але асцюкі амаль цалкам паадвальваліся пры абмалоце. Не перашкаджалі яны і пры дапрацоўцы збожжа.
Трыццаць цэнтнераў з гектара – нядрэнна, асабліва калі ўлічыць, што ніякіх дадатковых выдаткаў пры вырошчванні азімага ячменю мы не панеслі. Зразумела, у далейшым трэба імкнуцца да павелічэння ўраджайнасці, бо гэтая культура можа даваць і па пяцьдзясят цэнтнераў на круг. Сярод рэзерваў – аптымізацыя нормаў высявання насення і доз унясення мінеральных угнаенняў.
Ілона Бурая называе адну з галоўных прычын, па якой вырошчваць азімы ячмень выгадна – ранні тэрмін паспявання. У нашых кліматычных умовах ён гатовы да ўборкі ўжо ў сярэдзіне ліпеня. Гэта дае магчымасць папоўніць дэфіцыт бялковага складніку ў кармавым рацыёне буйной рагатай жывёлы. З іншых плюсоў – стабільная ўраджайнасць і, як прагназуецца, трывалы попыт на рынку.
– Гэтай восенню будзем пашыраць пасевы азімага ячменю да 200 гектараў, – гаворыць Ілона Бурая. – Цяпер ужо не страшна. Ды і тое, што кіраўнік нашай краіны Аляксандр Рыгоравіч Лукашэнка падчас нядаўняга наведвання Магілёўскай вобласці зрабіў акцэнт на неабходнасці паўсюднага вырошчвання гэтай культуры – добрая маральная падтрымка для нас.
Палетак азімага ячменю ў ААТ “Чэрвеньскі райаграсервіс” убралі двума камбайнамі за два дні. Зараз у гаспадарцы пачалі абмалот азімага рапсу.
Ігар АДАМОВІЧ. Фота аўтара
