Карэспандэнт “Раённага весніка” разам з намеснікам начальніка раённага аддзела па надзвычайных сітуацыях Аляксеем Батурам, намеснікам начальніка аддзела аховы правапарадку і прафілактыкі Чэрвеньскага РАУС Русланам Пракаповічам, супрацоўнікамі Дзяржаўтаінспекцыі Генадзем Рунцо і Ягорам Ваяводзіным выправіўся ў рэйд па вадаёмах.
Паводле рашэння райвыканкама, у раёне на сёння ёсць толькі два месцы, дзе дазволена купацца – пляжныя зоны Натальеўскага возера і ракі Волма паблізу аднайменнага санаторыя. На ўсіх астатніх водных аб’ектах купанне – пад забаронай.
– Некаторыя кіраўнікі нашы прадпісанні не выконваюць. Напрыклад, у красавіку мы даводзілі кіраўніцтву КСУП “Валевачы” патрабаванне неадкладна ўстанавіць таблічку “Купанне забаронена!”, а таксама прыбраць самаробны масток для скачкоў у ваду і кабінку для пераапранання на сажалцы ў вёсцы Чарнаградзь. Як бачыце, і па сённяшні дзень гэтае патрабаванне не выканана.
Падчас рэйду не знайшлі мы інфармацыі аб забароне купання на сажалках у Ялчы і Грабёнцы, на рацэ Уша ў Рудні і ля Уборак.
Апошні з названых водных аб’ектаў багаты на месцы стыхійнага адпачынку. У адным з іх Аляксей Батура правёў прафілактычную гутарку з мужчынам, які прыехаў да ракі на веласіпедзе з дачкой. Да нашай сустрэчы ён яшчэ раздумваў, купацца ці не. А пасля таго, як пачуў пра трагедыю у Велікаполлі, цвёрда вырашыў, што не варта рызыкаваць. У яшчэ адным забароненым для купання месцы, ля шлюза непадалёк ад вёскі Уборкі, Руслан Пракаповіч склаў пратакол на жыхара Жодзіна, які знаходзіўся ў вадзе. На першы раз усё абышлося папярэджаннем.
Напрыканцы рэйда мы завіталі на Натальеўскае возера. Нешматлікія аматары купання, як і належыць, знаходзіліся на пляжы пад наглядам работнікаў станцыі ратавання. Тут жа праводзілі маніторынг адказныя супрацоўнікі міліцыі. З хвіліны на хвіліну чакалі добраахвотных дружыннікаў.
– Калі ўсё пад кантролем – спакайней і тым, хто адпачывае, і тым хто адказны за іх бяспеку, – адзначыў Аляксей Батура.
Ігар АДАМОВІЧ
