Пры здзяйсненні адміністрацыйнага правапарушэння супраць бяспекі дарожнага руху і эксплуатацыі транспарту, супрацоўнік дарожна-патрульнай службы Дзяржаўтаінспекцыі выносіць у адносінах да ўдзельніка дарожнага руху пастанову аб накладанні адміністрацыйнага спагнання. Яна ўступае ў законную сілу з моманту вынясення. Не пазней чым на працягу месяца пасля гэтага штраф павінен быць аплачаны. У адваротным выпадку ён павялічваецца на дзве базавыя велічыні.
Калі штраф не аплачаны ва ўстаноўлены законам тэрмін, орган, які вядзе адміністрацыйны працэс, накіроўвае прадстаўленне ў аддзел прымусовага выканання, які прымае адпаведныя меры. Сярод іх – накладанне арышту на маёмасць даўжнiка, у тым ліку на грашовыя сродкі, якія знаходзяцца ў яго і ў іншых асоб; прыпыненне цалкам або часткова аперацый па бягучых (разліковых) і іншых банкаўскіх рахунках; канфіскацыя маёмасці даўжнiка, якая знаходзiцца ў яго ці ў іншых асоб; забарона здзяйсняць пэўныя дзеянні, цалкам або часткова карыстацца сваёй маёмасцю; апячатванне маёмасцi; канфіскацыя дакументаў, якія ўстанаўліваюць права, у тым ліку – каштоўных папер; часовае абмежаванне права на выезд з Рэспублікі Беларусь на ўстаноўлены судом тэрмін; часовае абмежаванне права на кіраванне механічнымі транспартнымі сродкамі, маламернымі судамі, а таксама – на паляванне.
Настойліва рэкамендуем жыхарам раёна выконваць Правілы дарожнага руху. Але, калі вы ўсё ж здзейснілі адміністрацыйнае правапарушэнне, то, каб пазбегнуць негатыўных наступстваў, лепш выплаціць штраф у 30-дзённы тэрмін з дня вынясення пастановы, да моманту перадачы яго ў аддзел прымусовага выканання.
Дзяржаўтаінспекцыя Чэрвеньскага РАУС
