Гэтую тэму дэпутат Палаты прадстаўнікоў Нацыянальнага сходу Рэспублікі Беларусь ад Чэрвеньскага, Бярэзінскага і Крупскага раёнаў Ігар Лаўрыненка закрануў днямі падчас сустрэчы з журналістамі газеты “Бярэзінская панарама”.
– Сёлета ў лютым я ўдзельнічаў у рабоце дыялогавай пляцоўкі ў Чэрвені, – распавёў ён. – Адным з пытанняў, якія там абмяркоўваліся, было стварэнне холдынгу з ліку раённых газет і “Мінскай праўды”. Але асабіста я лічу, што газета павінна быць раённай, заставацца бліжэй да людзей, якія жывуць у канкрэтным рэгіёне, адлюстроўваць мясцовыя падзеі.
Ці ёсць будучыня ў газеты? Абавязкова. І галоўная яе задача – знайсці людзей той канкрэтнай мясцовасці, дзе яна выдаецца, і несці запатрабаваную чытачамі інфармацыю. У раённых газетах, магчыма, не трэба асвятляць шырока тое, што друкуюць рэспубліканскія выданні, а аддаваць перавагу мясцовым навінам.
