Паведамленне аб узгаранні ў кватэры на першым паверсе двухпавярховага дома паступіла ратавальнікам раніцай 25 лістапада.
Як паведаміла “Раённаму весніку” інспектар сектара прапаганды і ўзаемадзеяння з грамадскасцю раённага аддзела па надзвычайных сітуацыях Алена Немагай, гарэння адкрытым полымем не было. У сатлелым ложку знайшлі мёртвым гаспадара кватэры, 1958 года нараджэння, пенсіянера. Папярэдняя прычына трагедыі – неасцярожнасць пры курэнні.
Гэта ўжо трэцяя з пачатку года гібель чалавека на пажары ў нашым раёне (летась за такі ж перыяд загінулі чацвёра). У двух папярэдніх выпадках ахвярамі полымя сталі курцы.
Ратавальнікі раяць:
– калі вы не можаце адмовіцца ад тытуню, не кідайце цыгарэты на падлогу і не курыце ў ложку;
– недакуркі трэба складваць у напоўненую вадой бляшанку (забудзьцеся пра звычку кідаць іх з балкона);
– устанавіце ў доме або кватэры аўтаномны пажарны апавяшчальнік, які своечасова паведаміць вам пра небяспеку ўзгарання.
Фота раённага аддзела па надзвычайных сітуацыях
