Педагогам беларускамоўных садкоў бывае складана навучыць сваіх выхаванцаў беларускай мове як роднай. Бо не сакрэт, што для большасці дзяцей першая мова, на якой яны вучацца гаварыць, думаць, мець зносіны з другімі людзьмі — руская. Як мы у смілавіцкім яслях-садку №2 вырашаем гэту праблему? Вясною разам з бацькамі выхаванцаў стварылі адзіны ў раёне міні-музей беларускай казкі.
Чаму мы абралі гэты накірунак? Бо паўнацэннае маўленчае развіццё дзіцяці абапіраецца на мастацкае слова: казкі, загадкі, прыказкі, прымаўкі. Да таго ж, наш музей, яе зараз модна, «кантактны»: у іншых музеях кранаць нічога нельга, а ў нашым — трэба!
Можна нават самастойна перастаўляць экспанаты! А, дарэчы, што гэта за экспанаты такія? Ды ўсе іх ведаюць з маленства! Піліпка-сынок, Дзед і Баба, Унук і Унучка, Каза-манюка, Кот-Залаты Лабок, Муха-Пяюха і многія іншыя персанажы беларускіх казак.
У нашым міні-музеі — некалькі раздзелаў. У «Беларускай хаце» — печ, збанкі, люлька, «павук», лапата, кошык з курыцай, персанажы казак (Дзед, Баба, Унук, Унучка). У «Полі» — Каза, масток, вясёлыя гусі, жаронцы, сноп, певень, у «Гульнятэцы» — настольныя гульні па сюжэтах беларускіх казак, у «Чароўным лесе» — чароўнае дрэва, Воўк, Ліса, Мядзведзь, Заяц, Каток-Залаты Лабок.
У«Тэатры казак» выхаванцы самі разыгрываюць казкі і паказваюць характары персанажаў, выкарыстоўваючы конусны тэатр, лялькі Бі-ба-бо, настольны і пальчыкавы тэатры. Ёсць у нашым міні-музее экспазіцыя «Казачныя аблокі». Тут экспанаты падвешаныя да столі, яны дапамагаюць абмяркоуваць персанажаў, адгадваць загадкі па казках.
У звычайным музеі дзіця толькі пасіўны назіральнік, а тут — сааўтар, творца экспазіцыі. Прычым, разам з бацькамі. У нашым міні-музеі выхавацелі праводзяць азнаямленчыя, развіваючыя і выхаваўчыя мерапрыемствы: гутаркі, абыгрыванне пацешак, казак, баяк, песенек. У гасцях у беларускай казкі дзеці ахвотна ўключаюцца ў дыялог, вывучаюць экспанаты, разгадваюць загадкі ў гульнявой і займальнай форме.
На пачатку лета мы вырашылі з тэмай нашага незвычайнага музея ўдзельнічаць у абласным фестывалі-конкурсе “Мір дзяцінства”. Зараз з гордасцю дзелімся прыемнай навіной: наш міні-музей беларускай казкі адзначаны дыпломам трэцяй ступені!
Гэты праект — яшчэ адна добрая магчымасць далучаць дзяцей да багацця беларускай мовы, развіваць творчыя здольнасці і фантазію, зацікауліваць беларускім фальклорам, выхоўваць лепшыя чалавечыя пачуцці: патрыятызм, дабрыню, спагадлівасць, гасціннасць і сумленнасць.
Алеся ЯРАШЭНКА, загадчык Смілавіцкага дзіцячага садка №2 .
Фота Наталлі КАРАЛЬКЕВіЧ