На базе Чэрвенскага тэрытарыяльнага цэнтра сацыяльнага абслугоўвання насельніцтва адбыўся абласны семінар. Каб абмеркаваць пытанні арганізацыі работы аддзяленняў забеспячэння дзённага знаходжання для інвалідаў і грамадзян пажылога ўзросту, сабраліся кіраўнікі цэнтраў сацыяльнага абслугоўвання са ўсіх раёнаў Мінскай вобласці, загадчыкі вышэй названых аддзяленняў.
Намеснік старшыні камітэта па працы, занятасці і сацыяльнай абароне Мінскага аблвыканкама Надзея Цупа адзначыла, што для правядзення семінара Чэрвенскі раён абраны невыпадкова — тут назапашаны пэўны вопыт работы з пажылымі грамадзянамі і інвалідамі.
Цікавасць ва ўдзельнікаў мерапрыемства выклікаў прадэманстраваны аматарскі відэафільм аб рабоце аддзяленняў, якія затым яны і наведалі. Тут госці пазнаёміліся з работай гурткоў, клубаў, майстэрняў, якія працуюць на базе гэтых двух аддзяленняў. Госці з задавальненнем адзначылі, што людзі з некаторымі псіхафізічнымі і фізічнымі абмежаваннямі маюць магчымасць тут рознабакова развівацца.
Падчас пленарнага пасяджэння ўдзельнікі дзяліліся вопытам работы. Прысутныя даведаліся, як арганізавана яна ў гарадах Барысаве, Любані і Крупках, і са станоўчага боку адзначылі ў Чэрвенскім цэнтры.
Сюрпрызам для гасцей раёна стала сапраўднае дэфіле – дзяўчыны, якія наведваюць у аддзяленні дзённага знаходжання інвалідаў швейную майстэрню і займаюцца ў атэлье “Лоскуток” пад кіраўніцтвам інструктара па працоўнай рэабілітацыі Таццяны Касцевіч, прадэманстравалі сукенкі, пашытыя сваімі рукамі.
Падводзячы вынікі семінара Надзея Цупа засведчыла, што работа з пажылымі грамадзянамі і інвалідамі ў Чэрвенскім тэрытарыяльным цэнтры сацыяльнага абслугоўвання насельніцтва вядзецца на высокім узроўні.
— Нягледзячы на недахоп фінансавых сродкаў, спецыялісты аддзяленняў, большай часткай сваімі намаганнямі і сваімі рукамі, змаглі стварыць дастойныя ўмовы для знаходжання ў іх людзей, для заняткаў па інтарэсах, — сказала яна. — Пакоі, дзе яны праходзяць, аздоблены з улікам усіх санітарных патрабаванняў, аформлены з вялікім густам, у іх утульна і камфортна. Гэтая хатняя атмасфера і прываблівае людзей.
З меркаваннем Надзеі Анатольеўны былі згодны таксама: Алена Чысцякова, начальнік аддзела сацыяльнай дапамогі пажылым грамадзянам камітэта па працы, занятасці і сацыяльнай аброне Мінскага аблвыканкама, Людміла Шэйдава, галоўны спецыяліст гэтага ж аддзела і Зоя Канапліна, начальнік аддзела дзяржаўнай падтрымкі сям’і.
Жадаючыя мелі магчымасць атрымаць напрацоўкі чэрвенскіх спецыялістаў па сацыяльнай рабоце ў электронным варыянце. Як адзначыла напрыканцы сустрэчы дырэктар Чэрвенскага цэнтра Людміла Шаркова, — “Мы робім усё магчымае, каб людзям у нашым цэнтры было ўтульна і цікава. Спадзяемся, што наш вопыт будзе для вас карысны”.
Таццяна МАРЦЬЯНАВА. Фота аўтара