Сярод першых у раёне трымалі своеасаблівы экзамен напярэдадні пачатку веснавых палявых работ у філіяле “Агра-Бокс” СП “Унібокс”. Тут больш за 80 працэнтаў прадстаўленай тэхнікі атрымала дазвол на далейшую эксплуатацыю.
Як распавёў “Раённаму весніку” галоўны інжынер філіяла «Агра-Бокс» Юрый Крук, сёлета ў гаспадарцы падрыхтаваліся да тэхагляду больш грунтоўна, чым летась. У прыватнасці, выдаткавалі неабходную колькасць фінансавых сродкаў на запчасткі для рамонту светлавога і іншага абсталявання, а таксама — на фарбу, каб надаць тэхніцы належны знешні выгляд.
Паводле слоў Юрыя Крука, тэхагляд стаў заключным этапам падрыхтоўкі трактароў да яравой сяўбы. Глебаапрацоўчая і пасяўная тэхніка тут таксама практычна гатовая выйсці ў поле.
Станоўчую ацэнку ўзроўню падрыхтаванасці філіяла «Агра-Бокс» да тэхагляду даў начальнік раённай інспекцыі Дзяржтэхнагляду Мікалай Капальнюк. А начальнік ДАІ Чэрвенскага РАУС Аляксандр Івашкевіч правёў гутарку з мясцовымі механізатарамі, падчас якой распавёў пра стан аварыйнасці на дарогах раёна, нагадаў пра неабходнасць строгага выканання транспартнай дысцыпліны падчас веснавых палявых работ.
Ігар АДАМОВІЧ.
Фота аўтара