Апошнім яе акордам стала ўшанаванне работнікаў закрытага акцыянернага таварыства “Турэц”. Напярэдадні свята 8-га Сакавіка іх павіншавалі старшыня райкама прафсаюза работнікаў аграпрамысловага комплексу Ларыса Ефіменка, дырэктар ЗАТ “Турэц” Артур Дзямко і старшыня мясцовага прафкама Таццяна Рак.
Падзякі і падарункі ад раённай прафсаюзнай арганізацыі атрымалі начальнік участка Алена Лізура, аператары свінагадоўчага комплексу Галіна Іванюценка, Дзіна Чарткова і начальнік забойнага цэху Лілія Кіпцікава.
Прафкам ЗАТ “Турэц” адзначыў Граматамі і падарункамі работнікаў гаспадаркі Кацярыну Варэнік, Вераніку Былынка, Таццяну Белякову і Станіслава Смірнова. Цудоўным аздабленнем свята стала выступленне з канцэртнымі нумарамі ансамбля народнай песні “Завалінка” Турэцкага сельскага Дома культуры.
– Акцыя “Наш жывёлавод” праводзіцца ў раёне, як і па ўсёй рэспубліцы, ужо трэці год, – адзначыла Ларыса Ефіменка. – Сумесна з прафсаюзным актывам гаспадарак і сацыяльнымі партнёрамі мы наведваем аб’екты жывёлагадоўлі, каб не толькі сказаць словы падзякі іх работнікам, але і даведацца аб праблемах, што тут існуюць, знайсці шляхі іх вырашэння.
Сёлета акцыя ахапіла чатыры малочнатаварныя комплексы, дваццаць малочнатаварных фермаў, трынаццаць фермаў па вырошчванню маладняку і буйной рагатай жывёлы, адзін свінагадоўчы комплекс. Усяго мы пабывалі на 38 жывёлагадоўчых аб’ектах. За шчырую працу былі адзначаны 154 жывёлаводы.
Падчас сустрэч у працоўных калектывах ішла гаворка пра важнасць унёску кожнага жывёлавода ў фінансава-эканамічны дабрабыт гаспадарак і раёна ў цэлым. Абмяркоўваліся пытанні налічэння і выплаты заработнай платы, захавання працоўнай дысцыпліны, забяспечанасці спецадзеннем і сродкамі індывідуальнай абароны, аховы працы і стварэння належных санітарна-бытавых умоў на рабочых месцах. Многія праблемы вырашаліся аператыўна, у дзень акцыі.
Ігар АДАМОВІЧ.
Фота аўтара
