У мінулую пятніцу ў Чэрвенскім раённым цэнтры культуры і адпачынку адбылося мерапрыемства, прысвечанае Дню інвалідаў. Падрыхтавалі яго людзі з абмежаванымі магчымасцямі, чым пацвердзілі, што ім пад сілу многае.
Распачала ўрачыстасць начальнік упраўлення па працы, занятасці і сацыяльнай абароне Чэрвенскага райвыканкама Алена Калтовіч. Яна адзначыла, што Дзень інвалідаў – гэта напамін пра тое, што ёсць людзі, якія маюць патрэбу ў падтрымцы дзяржавы, тых, хто побач з імі, а таксама яшчэ адна нагода прыцягнуць увагу да праблем людзей з абмежаванымі магчымасцямі, якія жывуць сярод нас. Сістэма аказання дапамогі і падтрымкі інвалідам, комплекс сацыяльна-рэабілітацыйных мер дазваляюць многім пераадолець наступствы захворванняў і аднавіць працаздольнасць, — падкрэсліла Алена Анатольеўна. Яна таксама падзякавала сацыяльным работнікам, настаўнікам, выхавальнікам, урачам — ўсім, хто дорыць гэтым людзям цяпло і ўвагу, хто неабыякавы да іх праблем, клапоціцца пра дзяцей з абмежаванымі магчымасцямі, дапамагае ім вырасці адукаванымі і замацавацца ў абранай сферы дзейнасці. Нягледзячы на свае немачы, гэтыя людзі яшчэ раз даказалі, што здольныя быць карыснымі грамадству, займаць актыўную жыццёвую пазіцыю, дабівацца значных поспехаў у вучобе, мастацтве, спорце і ў прафесійнай дзейнасці.
Пацвярджэнне гэтаму — выстава і канцэрт, падрыхтаваныя выхаванцамі Чэрвенскага дома-інтэрната для дзяцей-інвалідаў і маладых інвалідаў з асаблівасцямі псіхафізічнага развіцця, пражываючымі у Чэрвенскім псіханеўралагічным доме-інтэрнаце, наведвальнікамі аддзялення забеспячэння дзённага знаходжання інвалідаў Чэрвеньскага раённага тэрытарыяльнага цэнтра сацыяльнага абслугоўвання насельніцтва.
Яны паказалі, што сапраўды ўмеюць многае. На выставе – розныя вырабы з керамікі і паперы, вязаныя і вышываныя сурвэткі і шкарпэткі, кошыкі і вазы, навагоднія цацкі і шмат іншага. Жадаючыя мелі магчымасць набыць сувеніры.
Дружна апладзіравалі ўдзельнікі мерапрыемства самадзейным артыстам, якія спявалі, ставілі сцэнкі, чыталі вершы, танцавалі.
Таццяна МАРЦЬЯНАВА.
Фота аўтара