Поўную залу ў Чэрвені сабрала дабрачынная акцыя-канцэрт, сродкі ад якой пойдуць на выраб і ўстаноўку помніка воінам-інтэрнацыяналістам у Бярэзінскім раёне.
Да акцыі далучыліся спартсмены і артысты, у ліку якіх — пераможца і прызёр міжнародных спаборніцтваў па кікбоксінгу Арцём Машара, удзельніца расійскага шоў “Голас” Аляксандра Няхай, аўтары-выканаўцы Юрый Бельскі і Віктар Каліна.
Віктар Казачонак і Алег Купіч, якія ўзначальваюць раённыя арганізацыі ветэранаў вайны ў Афганістане ў Чэрвенскім і Бярэзінскім раёнах, са сцэны падзякавалі ім і гледачам за падтрымку.
— Дапамога, якую вы аказваеце Бярэзінскаму раёну ў стварэнні помніка, вельмі значная, — зазначыў Віктар Казачонак. — Мы праз гэта ужо прайшлі, калі адкрывалі памятны знак ураджэнцам Чэрвеншчыны, якія загінулі ў Афганістане.
— Шматгадовыя сяброўскія адносіны аб’ядноўваюць Чэрвенскі і Бярэзінскі раёны. Канцэрт яшчэ больш нас згуртуе, — такое меркаванне выказала начальнік аддзела ідэалагічнай работы, культуры і па справах моладзі райвыканкама Лідзія Шчацінка.
Калі гледачы падтрымлівалі артыстаў апладысментамі, то арганізатары мерапрыемства – лістамі Падзякі.
Адкрывала канцэрт адна з апошніх песен Віктара Цоя “Кукушка” у выкананні Аляксандры Няхай. Са сцэны гучалі песні не толькі пра вайну. Аўтар-выканаўца, удзельнік баявых дзеянняў у Афганістане Юрый Бельскі ў свой выступ уключыў лірычную кампазіцыю на беларускай мове “Вязынка”.
Адзін з ідэйных натхняльнікаў акцыі Павел Клындзюк выказаўся пасля мерапрыемства:
— Вялікую падзяку хачу адрасаваць Арцёму Машару, Аляксандры Няхай, Юрыю Бельскаму, Віктару Каліне, якія ў такі знамянальны дзень знайшлі час для ўдзелу ў акцыі і зрабілі свой унёсак у выраб і ўстаноўку помніка воінам-інтэрнацыяналістам! Дзякуй людзям, якія прыйшлі на канцэртную праграму і падтрымалі ветэранаў вайны! Дзякуй усім, хто прыняў удзел у падрыхтоўцы акцыі, — ваша дапамога неацэнная!
Сняжана КАЎГАРЭНЯ.
Фота аўтара
