Сёлета на Міншчыне назіраецца рост аварый з непаўналетнімі. З пачатку года ў вобласці зарэгістравана 73 дарожна-транспартныя здарэнні з удзелам дзяцей, у выніку якіх 7 з іх загінулі і 77 атрымалі траўмы. На тэрыторыі нашага раёна такіх здарэнняў сёлета не было.
У мэтах своечасовага рэагавання на цяперашняе становішча ў сферы бяспекі дарожнага руху, папярэджання і зніжэння цяжару наступстваў дарожна-транспартных здарэнняў з удзелам непаўналетніх напярэдадні і падчас восеньскіх школьных канікулаў, Дзяржаўтаінспекцыя з 22 кастрычніка да 7 лістапада праводзіць прафілактычную акцыю “Бяспечныя канікулы”.
Падчас яе ў апошні тыдзень вучэбнай чвэрці супрацоўнікі міліцыі грамадскай бяспекі сумесна з прадстаўнікамі ўпраўлення адукацыі праводзяць у школах прафілактычныя гутаркі сярод дзяцей аб правільных паводзінах на дарозе. Выступленні таксама ладзяцца ў працоўных калектывах і на бацькоўскіх сходах. Пры гэтым асаблівая ўвага звяртаецца на выкарыстанне дзецьмі святловяртальных элементаў у цёмны час сутак. Пад асаблівым кантролем ДАІ – вадзіцелі, якія перавозяць непаўналетніх.
Паважаныя дарослыя! Будзьце прыкладам на дарозе для дзяцей, не пакідайце іх без нагляду!
Аляксандр МАНУЛІК,
старшы дзяржаўтаінспектар ДАІ Чэрвеньскага РАУС
