Калыска лесу — так без перабольшвання можна назваць гадавальнік Чэрвеньскага лясгаса. Тут на плошчы амаль сем гектараў вырошчваюць лесаўтваральныя пароды дрэў – хвою звычайнаю, елку еўрапейскую, дуб чарэшчаты, клён, ліпу – для ўзнаўлення лесу на месцы высечак.
– Саджанцы з закрытай каранёвай сістэмай гадуем у трох цяпліцах, – гаворыць начальнік гадавальніка Таццяна Мароз. – Таксама маем два полі для дарошчвання. А ў цяпліцах на тэрыторыі вытворчага майстарскага цэха “Загор’е” вырошчваем дэкаратыўны пасадачны матэрыял для азелянення тэрыторый – туі, ядловец, цісы.
У гадавальніку працуюць дзесяць чалавек, палова з іх – на пастаяннай аснове. У сувязі з вырошчваннем саджанцаў з закрытай каранёвай сістэмай, праца ў нас не спыняецца нават зімой. Застаюцца два-тры работнікі, якія заносяць у цяпліцы снег, каб глеба ў пасадачным матэрыяле не перасыхала.
Як распавяла Таццяна Мароз, вырашчаных у гадавальніку саджанцаў хапае не толькі для патрэб лясгаса, але і на продаж. У прыватнасці, сёлета ужо рэалізавалі іх на 25 тысяч рублёў пры гадавым плане 30. Але восеньскі сезон продажу пасадачнага матэрыялу яшчэ толькі пачынаецца.
Ігар АДАМОВІЧ. Фота аўтара