АСНОЎНАЕ ПРА ПАДЗЕЮ
30-31 студзеня ў Мінску адбыўся III рэгіянальны форум «Роля рэгіянальных СМІ ў развіцці сацыяльнага партнёрства». Яго арганізатары — Федэрацыя прафсаюзаў Беларусі і Міністэрства інфармацыі. Актыўны ўдзел у працы форума прынялі каля 150 журналістаў рэспубліканскіх і рэгіянальных выданняў, сярод якіх быў і карэспандэнт «Раённага весніка». Двухдзённая праграма была насычанай, цікавай і карыснай.
У рэспубліканскім Доме прафсаюзаў адбылося пленарнае паседжанне, у якім удзельнічалі старшыня Федэрацыі прафсаюзаў Міхаіл ОРДА, яго намеснік Алена МАНКЕВІЧ, начальнік упраўлення інфармацыйна-аналітычнай работы Міністэрства інфармацыі Таццяна ХМЕЛЬ, журналісты і старшыні раённых аб’яднанняў прафсаюзаў.
У сваім звароце да ўдзельнікаў Міхаіл ОРДА назваў форум камунікатыўнай пляцоўкай для адкрытага дыялогу, дзе можна абмеркаваць найбольш значныя для грамадства тэмы. У фармаце гэтага дыялогу ўдзельнікі абмеркавалі актуальныя пытанні дзейнасці прафсаюзных арганізацый і механізмы ўзаемадзеяння са СМІ.
НАВОШТА МЫ ПРАФСАЮЗАМ, альбо МЫ – ІХ РУПАР
Федэрацыя прафсаюзаў Беларусі (ФПБ) — самая масавая грамадская арганізацыя краіны, аб’ядноўвае звыш 4 з паловай мільёнаў чалавек (95 працэнтаў эканамічна актыўнага насельніцтва). Сродкі масавай інфармацыі дапамагаюць грамадству даведацца аб падзеях, якія адбываюцца ў прафсаюзным руху, аб праблемах, што ўзнікаюць, і аб тым, як гэтыя праблемы вырашаюцца. Акрамя таго, рэгіянальныя СМІ сёння самі дапамагаюць вырашаць сацыяльныя праблемы на месцах. Аб гэтым гаварыў Міхаіл ОРДА ў сваім выступленні.
— Мы расказваем журналістам аб дзейнасці Федэрацыі прафсаюзаў Беларусі, — дадала намеснік старшыні ФПБ Алена МАНКЕВІЧ. – Паведамляем, з якімі ініцыятывамі выступаем, якіх дасягнулі вынікаў па абароне правоў працоўных. У сваю чаргу, журналісты, знаходзячыся ў цэнтры ўсіх раённых падзей, дапамагаюць нам пазнаёміцца з жыццём у рэгіёнах, даведацца, з якімі праблемамі сутыкаюцца іх землякі.
Начальнік упраўлення інфармацыйна-аналітычнай работы Міністэрства інфармацыі Таццяна ХМЕЛЬ зазначыла, што ў супрацоўніцтве СМІ і прафсаюзаў закладзены велізарны патэнцыял сацыяльнага партнёрства:
-Сёння пагадненне паміж органамі ўлады, наймальнікамі і прафсаюзамі — адна з найважнейшых задач дзяржавы. Менавіта сродкі масавай інфармацыі павінны дапамагчы людзям разабрацца ў пагадненні, паказаць ролю і функцыі аднаго з буйнейшых грамадскіх аб’яднанняў краіны.
НАВОШТА НАМ ПРАФСАЮЗЫ, альбо ЯНЫ — НАШ ХЛЕБ
У прафсаюзным жыцці адбываецца мноства падзей. Кожная з такіх падзей – інфармацыйны повад для напісання газетнага матэрыяла. Цеснае супрацоўніцтва з прафсаюзнымі лідэрамі на месцах, веданне сітуацыі, асабістыя таварыскія сувязі, зацікаўленасць у праўдзівай інфармацыі і якасным данясенні яе да чытачоў дае журналісту магчымасць быць заўжды забяспечаным цікавай работай, карыснай і для аўтара, і для грамадства.
Вось, напрыклад, шэраг праблем, якія абмяркоўваліся на пасяджэнні і да якіх наша газета плануе звярнуцца ў хуткай будучыні, каб больш шырока распавесці аб іх чытачам Чэрвеньшчыны:
— плюсы і мінусы плануемых змяненняў у кантрактнай сістэме найму (з работнікамі, якія працяглы тэрмін працуюць добрасумленна, прапануецца заключаць кантракт як мінімум на 3 гады ці пераходзіць на бестэрміновыя ўмовы працы);
— шляхі падтрымкі працаўнікоў тых прадпрыемстваў, што сутыкнуліся з часовымі праблемамі (банкроцтва, санацыя, скарачэнне штатаў, змена формы уласнасці і г.д.). Для іх можа быць створаны так званы кампенсацыйны фонд. Па прапанове ФПБ гэтыя пытанні цяпер разглядаюцца ў Савеце Міністраў;
— стварэнне новых працоўных месцаў (на думку прафсаюзаў, значны рэзерв маецца ў турыстычнай сферы);
— правы і абавязкі маладых спецыялістаў;
— пенсійнае забеспячэнне;
— сацыяльныя гарантыі спецыялістам, занятым у лічбавай эканоміцы.
Журналісты рэгіянальных і абласных сродкаў масавай інфармацыі атрымалі на форуме Граматы і Падзякі ад Федэрацыі прафсаюзаў і Міністэрства інфармацыі за шматбаковае асвятленне прафсаюзнага жыцця. Прадстаўнікі ФПБ прапанавалі правядзенне рэспубліканскага конкурсу на лепшае асвятленне ў СМІ пытанняў дзейнасці прафсаюзаў. Міністэрства інфармацыі падтрымала ініцыятыву. Так што, паважаныя члены прафсаюзаў і лідэры пярвічак, спяшайцеся падаць нам свой інфармацыйны повад – і ён абавязкова стане матэрыялам для публікацыі!
ТУРЫСТЫЧНАЯ ВЫСТАВА
Давялося разам з удзельнікамі форуму наведаць турыстычную выставу «Профтур — 2018». Тут быў прадстаўлены шырокі турыстычны патэнцыял Беларусі і замежныя тураператары з Азербайджана, Арменіі, Грузіі, Літвы, Расіі, Украіны. Можна было адшукаць адпачынак на любы густ: анімацыйныя туры выхаднога дня на базах «Беларустурыста»; санаторныя паслугі; экскурсіі па Беларусі; экскурсіі за мяжу; адпачынак у аграсядзібе; паездкі на мора; гастранамічныя туры; прамысловы турызм.
Дарэчы, апошні сёння вельмі актуальны сярод замежных турыстаў, папулярнасць экскурсій на беларускія прамысловыя прадпрыемствы расце. Хацелася б на наступнай аналагічнай выставе ўбачыць і родную Чэрвеньшчыну: ці не ў нас ёсць, напрыклад, адзіная ў Беларусі фабрыка па вырабу валёнак? Як бы добра глядзелася яе прадукцыя на той выставе!.. І ад пакупнікоў бы адбою не было, і, думаю, ад заявак на экскурсіі.
БУРДА І ЯГО…ІКРА
«Адмецінкай» выставы стаў вядомы тэлевядучы і інтэлектуал, знаёмы многім па тэлегульням элітарнага клуба «Што? Дзе? Калі?» Барыс БУРДА. Ён правёў кулінарны майстар-клас і пазнавальную віктарыну.
Мне, як іграку ў “ЧДК”, было асабліва цікава ўбачыць жывога Бурду, узяць аўтограф, крыху пагутарыць, паадказваць на пытанні. Дарэчы, ніводнага прызу не атрымала – але і недакладныя адказы вядучы “афармляў” у нейкія зусім някрыўдныя, вясёлыя фармуліроўкі)) Давялося паспрабаваць і кулінарны “піск” мэтра – бутэрброды з чырвонай ікрой, шынкаванай цыбуляй і смятанай. Тут нашы меркаванні, прызнацца, разыйшліся – застануся прыхільнікам класікі: масла, ікра, батон… А аўтограф зберагу, на відным месцы змяшчу: усё ж такі легенда!..
МАЙСТАР-КЛАСЫ
Укід, тролінг, скрыты тролінг, жаўцізна, фэйкавыя старонкі, фэйкавыя групы, дэструктыўныя сайты, акаўнты-боты, як не весціся, што супрацьпаставіць, выстройванне адносін, імідж, топавыя навіны – адным з самых насычаных па інфарматыўнасці, сучаснасці і карыснасці майстар-класаў было выступленне намесніка старшыні ФПБ Алены МАНКЕВІЧ. Яна сама журналіст, доўга працавала і ў газеце, і на інтэрнет-партале, выступае дакладна, сцісла, выключна “па тэме”, дае вельмі карысныя прафесійныя рэкамендацыі. “Рэгіянальныя СМІ — крыніца, з якой людзі атрымліваюць інфармацыю аб рэальнай дапамозе прафсаюзаў, -зазначыла Алена МАНКЕВІЧ. — Гэтым выданням давяраюць, яны карыстаюцца павагай. Наша задача — быць аўтарытэтнымі каментатарамі, распавесці чалавеку, як узнікшую праблему можна аператыўна вырашыць, а пры неабходнасці ўмяшацца ў канфліктную сітуацыю”.
Журналісты раённых СМІ шмат карыснага ўзялі для сваёй работы і з майстар-класаў галоўнага рэдактара Выдавецкага дома «Звязда» Паўла СУХАРУКАВА, рэдактара «Сельскай газеты» Сяргея МІХОВІЧА, рэдактара інфармацыйнага партала ФПБ 1prof.by Аляксея ПАШКЕВІЧА.
Наталля КАРАЛЬКЕВІЧ. Фота аўтара