Тры дзяўчыны прыехалі па размеркаванню ў Чэрвеньскі раённы Цэнтр культуры і адпачынку. Знаёмцеся, гэта Марына Ліхадзедава, Валянціна Задзірава і Караліна Шыракеева.
Караліна Шыракеева: «У маёй сям’і шмат творчых родзічаў. Не хачу ад іх адставаць».
Караліна з Магілёва. Скончыла ў родным горадзе гімназію-каледж мастацтваў, харэаграфічнае аддзяленне. У Цэнтры культуры — кіраўнік харэаграфічнага гуртка. Да яе прыходзяць дзеці з 1-га па 6-ы клас — дзве ўзроставыя групы. З кожнай займаецца асобна. “Танцавала, колькі сябе памятаю, — гаворыць дзяўчына. — Усё, што ведаю і ўмею, хачу перадаць сваім выхаванцам. Цяпер я настаўнік харэаграфіі.
Захаплялася Караліна і спортам, і маляваннем, і музыкай, і танцамі. На іх і спынілася. І зараз любіць памаляваць, паспяваць… Чэрвень спадабаўся дзяўчыне: “Горад чысты, людзі ветлівыя”.
Марына Ліхадзедава: «Галоўнае ў жыцці чалавека — сям’я».
Таму і назвала свой танцавальны гурток «Big family».
З дзяцінства падабалася ёй танцаваць. Нарадзілася ў Мінску. Тут умоў для ўсебаковага развіцця хапала. Спачатку займалася ў школе «Кроха»: малявала, спявала, танцавала. Пазней зразумела, што танцы бліжэй за ўсё. Скончыла Мінскі дзяржаўны каледж мастацтваў, аддзяленне харэаграфіі, спецыялізацыя — сучасны танец. “Сучасная харэаграфія дазваляе ўсё, што патрабуе душа, — сцвярджае Марына. — Усе пачуцці можна выказаць у рухах. Вось гэта мне цікава”.
У гуртку, якім кіруе малады спецыяліст, займаюцца дзяўчынкі з 7 па 11 класы. Выконваюць расцяжкі, сілавыя практыкаванні на падтрымку фігуры, тонуса арганізма. Гэта ўсё накіравана на фізічнае развіццё, прыгажосць цела, пластыку, грацыю. Развучваюць вулічныя танцы, хіп-хоп. Тут таксама шмат магчымасцяў для імправізацыі.
Жыве Марына ў Мінску, на работу прыязджае штодня, таму што ў яе ёсць муж: “Не хочацца жыць асобна ад яго, мы — сям’я».
Валянціна Задзірава: «Мне даручылі метадычную работу».
Напэўна таму, што малады спецыяліст мае вышэйшую адукацыю — скончыла Мінскі ўніверсітэт культуры, факультэт сацыа-культурнай дзейнасці. Спецыялізацыю прайшла на кафедры міжкультурных камунікацый. Гэта падразумявае стварэнне і рэалізацыю разнастайных культурных праектаў, узаемадзеянне з іншымі краінамі ў сферы культуры — выставы, канцэрты і іншыя.
— Чэрвень спадабаўся, — сказала дзяўчына. — Горад спакойны. Буду весці яшчэ якійсьці гурток для маленькіх дзетак. Выбрала такую прафесію, бо праз яе можна рэалізаваць свае таленты.
Таццяна МАРЦЬЯНАВА. Фота аўтара