Эксперыментальная база “Натальеўск” – прызнаны лідар сельскагаспадарчай вытворчасці ў раёне па пераважнай большасці накірункаў. Бульбаводства – не выключэнне.
Сёлета “другі хлеб” на Чэрвеньшчыне вырошчваюць пяць гаспадарак. Агульная плошча пасадкі – амаль 400 гектараў. З іх 250 прыпадае на “Натальеўск”.
Гэтай культурай тут займаюцца даўно і грунтоўна. Нават у не вельмі ўраджайныя гады ў “Натальеўску” заўсёды былі з бульбай.
– Уборку пачалі з сярэдняспелага гатунку “Янка” айчыннай селекцыі на палетку ля вёскі Камісарскі Сад, – распавядае галоўны аграном гаспадаркі Сяргей Бабіновіч. – Гектар у сярэднім дае амаль 400 цэнтнераў клубняў. Ураджайнасць – рэкордная для нас па гэтаму гатунку і блізкая да максімальнай па яго біялагічных уласцівасцях. Акрамя “Янкі”, вырошчваем яшчэ сем гатункаў бульбы: нямецкі “Саціна”, галандскі “Рыўера”, беларускія “Брыз”, “Уладар”, “Скарб”, “Маніфест” і “Вектар”. Першапачаткова меркавалі мець сем – сем з паловай тысяч тон клубняў. Але, падобна, што будзе нават крыху больш.
Паводле слоў Сяргея Бабіновіча, атрыманню добрага ўраджаю спрыяе строгае выкананне тэхналогіі вытворчасці бульбы. У прыватнасці, у гаспадарцы не эканомяць на сродках аховы раслін. Як заўважыў галоўны аграном, пры ўраджайнасці больш за 300 цэнтнераў на круг і прымальнаму кошту рэалізацыі вытворчасць бульбы рэнтабельная.
Ігар АДАМОВІЧ. Фота аўтара
