У сярэднім па 45 цэнтнераў збожжа з гектара дае хлебная ніва ў сельскагаспадарчым вытворчым філіяле «Новыя Зелянкі» адкрытага акцыянернага таварыства «Мінскі малочны завод №1». На сёння гэта — самая высокая на Чэрвеньшчыне ўраджайнасць зерневых.
Лідары ўнутрыгаспадарчага спаборніцтва — старшы камбайнер Дзмітрый Сергіеня і камбайнер Аляксандр Караткоў — перасягнулі паўтысячны рубеж намалоту без уліку рапсу.
– У бізнес-план на сёлета закладвалі ўраджайнасць зерневых 42 цэнтнеры з гектара, – распавядае дырэктар гаспадаркі Уладзімір Лаўрык. – Тое, што атрымліваем больш, канешне ж, прыемна. Значыць, недарэмна выдаткоўвалі сродкі, напружвалі сілы.
Пакуль што ўбіраем ячмень ( 47 цэнтнераў з гектара) і азімую пшаніцу (44 цэнтнеры з гектара). Таксама разлічваем на высокі ўраджай трыцікале. Дзяржзаказ выканалі ўжо на 73 працэнты, рэалізаваўшы 430 тон збожжа.
Рэзервы для павышэння ўраджайнасці на наступныя гады яшчэ ёсць. Гэта – больш шчыльная гушчыня пасеваў і павелічэнне дозы іх падкормкі мінеральнымі ўгнаеннямі.
Камбайнавы парк гаспадаркі немалады: самаму новаму камбайну – 6 гадоў, старэйшым – дванаццаць-трынаццаць. Але, дзякуючы беражліваму стаўленню механізатараў да тэхнікі і стараннай працы інжынернай службы, вялікіх выдаткаў на іх рамонт не патрабуецца…
Як распавёў Уладзімір Лаўрык, зладжанасці на жніве спрыяе вопыт старшых камбайнераў Любаміра Сергіені, Дзмітрыя Сергіені, Уладзіміра Палянскага, Сяргея Ільючыка і Андрэя Красоўскага. Дзмітрый Калтовіч, які сёлета ўпершыню ўзначаліў экіпаж збожжаўборачнага камбайна, таксама хутка асвоіўся ў калектыве.
На адвозцы збожжа працуе пяць аўтамашын. Пры неабходнасці можна дадаткова задзейнічаць трактар з загерметызаваным прычэпам. Зернесушыльны комплекс “Амкадор” без праблем спраўляецца з немалым аб’ёмам збожжа, якое паступае з поля. Тым больш, што вільготнасць яго пераважна блізкая да нормы.
Ігар АДАМОВІЧ. Фота аўтара
