Гаспадаркі Чэрвеньшчыны завяршаюць перавод буйной рагатай жывёлы на летні пашавы перыяд.
Як паведаміла намеснік начальніка ўпраўлення сельскай гаспадаркі і харчавання райвыканкама па жывёлагадоўлі Алеся Глінкова, на сярэдзіну тыдня ў раёне выгналі ў поле 27 гуртоў кароў, з іх 7 ужо знаходзяцца на кругласутачнай пасьбе. Паводле яе слоў, у цэлым пераход на летні пашавы перыяд прайшоў арганізавана, хаця напачатку яго стрымлівала непагадзь.
Аднымі з першых у раёне перавялі дойны статак на пашу жывёлаводы малочнатаварнай фермы “Клінок” адкрытага акцыянернага таварыства “10 з’езд Саветаў”.
— Напачатку каровы знаходзіліся ў полі з дзевяці гадзін раніцы да пяці вечара, – распавядае брыгадзір фермы Тамара Несцяровіч. – Да травы прывучалі іх паступова, падкормліваючы ў хляве сенажом. Шмат ў чым дзякуючы гэтаму, не згубілі малако, а, наадварот, істотна дадалі ў надоях. Зараз у сярэднім ад каровы атрымліваем яго па 13 кілаграмаў. З пераводам на кругласутачную пасьбу, які мы ўжо арганізавалі, разлічваем павялічыць прадукцыйнасць дойнага статка яшчэ на два кілаграмы.
Ігар АДАМОВІЧ. Фота аўтара