Прафсаюзная выдатная «шасцёрка» будзе прадстаўляць Чэрвеньскі раён вясной на вобласці

Рэспубліканскі прафсаюзны конкурс творчасці працоўных калектываў «Новыя імёны Беларусі», ініцыятарам якога ў мінулым годзе выступіла Федэрацыя прафсаюзаў Беларусі, вельмі спадабаўся гледачам і ўдзельнікам. Таму было вырашана зрабіць яго штогодным. Галоўнай сёлетняй асаблівасцю стала пашырэнне жанраў, у якіх могуць удзельнічаць канкурсанты. Так, з»явілася намінацыя «Выяўленчае і дэкаратыўна-прыкладное мастацтва». Акрамя таго, удзельнічаць зараз можа не толькі моладзь: узрост перастаў мець абмежаванні. У намінацыі «Сцэнічнае мастацтва» дазволена выступаць групам ад 4 да 10 чалавек, у тым ліку членам сем»яў канкурсантаў.
У дзень раённага этапу конкурсу «Новыя імёны Беларусі-2016» зала раённага Цэнтра культуры і адпачынку была поўная гледачоў. Усіх, хто прыйшоў, да пачатку канцэрта ў фае чакала выстава дэкаратыўна-прыкладнога мастацтва. Свае работы прадставілі ўрачы і бухгалтары, медсёстры, таваразнаўцы — людзі, пра якіх, каб не выстава, то ніколі б і не здагадаўся, што яны такія творчыя таленавітыя асобы. Усіх уразілі тонкія, філігранныя работы па вышыўцы, створаныя Галінай ГАРЛОЎСКАЙ (выхавацель Чэрвеньскага дома-інтэрната для дзяцей і маладых інвалідаў і ўрачом-педыятарам райбальніцы Жанай МЫШКАВЕЦ. Вельмі прыгожыя і арыгінальныя работы — каляровыя вітражы на шкле, —стварае Ларыса БАНДАРОВІЧ, спецыяліст па арганізацыйна-кааператыўнай рабоце райпо. Гэтаму нялёгкаму і нятаннаму майстэрству вучацца і яе дачушкі Даша і Паліна, вітражы якіх таксама былі прадстаўлены на конкурсе.
Шмат напрамкаў творчасці, якімі захапляецца старшая медсястра псіханеўралагічнага інтэрната для дарослых Марына ЯКУБОЎСКАЯ. Некалькі сваіх работ, у тым ліку па зусім нядаўна асвоенай тэхналогіі — лялькі з гліны, — яна прадставіла на конкурс. Гледачы нават пыталіся аб кошце, жадаючы набыць такую прыгажосць.
Пасля змястоўнага, добра падрыхтаванага адкрыцця конкурсу і віртуальных віншаванняў, дасланых удзельнікам конкурсу мастацкімі калектывамі раёна, пачаліся выступленні канкурсантаў. Тут многія таксама прадэманстравалі здольнасці, пра якія ніхто з гледачоў не здагадваўся. Напрыклад, супрацоўнікі ЖКГ, якіх усе звычайна бачаць толькі ў рабочых абставінах, парадавалі зал і журы беларускай песняй і яркімі народнымі касцюмамі.
Жанр песень быў самы розны — ад рэпа, што чытаў Рустам ДУСТАЎ (Чэрвеньскае ЖКГ) да французскамоўнай кампазіцыі ў выкананні Юліі БАБОВІЧ (лясгас). Кранальным было выступленне Ларысы ПАПОВАЙ (дом-інтэрнат для дзяцей). Калі яна выконвала песню-баладу «Там нет меня», у зале павісла такая дрыготкая цішыня,быццам ва ўсіх гледачоў сэрцы адначасова зціснуліся і спыніўся подых. А калі песня скончылася, то раздаліся вельмі гучныя апладысменты!
Журы конкурсу вызначыла пераможцаў у дзвюх намінацыях. Сярод аўтараў работ дэкаратыўна-прыкладнога мастацтва раён на абласным этапе будуць прадстаўляць Галіна ГАРЛОЎСКАЯ, Ларыса БАНДАРОВІЧ і Марына ЯКУБОЎСКАЯ. Сярод спевакоў лепшымі прызнаны Дзяніс ГАЛАВЕНЧЫК (Тэрытарыяльны цэнтр абслугоўвання насельніцтва), Аляксей ГАНЧАРЫК (Смілавіцкі аграрны калежд) і Ларыса ПАПОВА (Чэрвеньскі дом-інтэрнат для дзяцей і маладых інвалідаў). Гэта «выдатная шасцёрка» будзе прадстаўляць прафсаюзы раёна вясной на вобласці. Пажадаем ім усім поспеху!
Наталля КАРАЛЬКЕВІЧ. Фота аўтара