Аб тым, як ўсё адбывалася, расказала загадчыца стаматалагічнага аддзялення Валянціна Мікалаеўна Ніціеўская:
— Пачалося з падрыхтоўкі праектна — каштарскай дакументацыі, бо праводзіўся не проста рамонт, а рэканструкцыя ўсяго будынку. Былі закуплены неабходныя матэрыялы, падабралі будаўнічую арганізацыю, якая магла б ў кароткі тэрмін выканаць усе неабходныя работы.
Ішоў рамонт, але мы прыём пацыентаў не спынялі, цясніліся па некалькі чалавек у кабінеце. Пасля рамонту мы сваімі сіламі прыбралі памяшканні. Неабходнае для работы абсталяванне я шукала ў інтэрнеце, вывучала навінкі. Вельмі хацелася набыць патрэбнае, сучаснае, якаснае і таннае. Прыемна, што спецыяльную стаматалагічную тэхніку высокай якасці вырабляюць нашы беларускія прадпрыемствы.
Абнаўленне стаматалагічнага аддзялення стала магчымым пры дапамозе старшыні райвыканкама Андрэя Леанідавіча Зубара. Вялікі дзякуй хачу сказаць і намесніку па сацыяльнай сферы і ідэалогіі Але Канстанцінаўне Шахоцька, галоўнаму ўрачу Мікалаю Мікалаевічу Снытко.
-Якія паслугі будзе аказваць абноўленае аддзяленне?
— Найперш тэрапеўтычныя паслугі — лячэнне, артапедычныя — пратэзіраванне, хірургічныя, прафілактычныя. З’явіцца новая паслуга — будзе працаваць рэнтгенкабінет. Цяпер наведвальнікам не трэба будзе бегчы па здымак хворага зуба ў цэнтральную бальніцу. Зробім ўсё на месцы. Гэта даўнішняя мара не толькі пацыентаў, але і наша. Каб разумелі: абсталяванне такога кабінета патрабуе спецыяльных умоў, спецыяльнага аздаблення, нятаннага абсталявання. Таму доўгі час гэта было не магчыма. Але, дзякуючы кіраўніцтву раёна, усё вырашылася.
— Ці будуць змены у пратэзіраванні?
— Так. Акрамя ўжо існуючых, плануем працаваць з металакерамічнымі пратэзамі. Набываем неабходнае абсталяванне, запрасілі спецыялістаў, мяркую, ўсё атрымаецца. У парадантозным кабінеце з’явіцца новая паслуга — шыніраванне (гэта спецыяльныя працэдуры для чысткі, умацавання зубоў і дзяснаў).
— Як справы са спецыялістамі увогуле?
— У нашым калектыве працуе шаснаццаць чалавек. Гэта урачы, медсёстры, санітаркі. У жніўні чакаем на працу трох урачоў-стаматолагаў — інтэрнаў. На пастаянную працу прыедзе ўрач стаматолаг у пасёлак Смілавічы. У калектыве адносіны добразычлівыя, асноўныя ўрачы Алена Васільеўна Грыбко, Ала Станіславаўна Мядзведзева, Святлана Іванаўна Хмылова, Алена Уладзіміраўна Лашкевіч працуюць шмат гадоў. Пацыенты ўдзячны ім за прафесіяналізм. Сама я прыехала ў Чэрвень па размеркаванню ў 1992 годзе. З 2008 года ўзначальваю калектыў стаматалогіі.
Каб павысіць сярод насельніцтва ўзровень ведаў па здароваму ладу жыцця, сёлета ў гімназіі адкрываем гурток «Школа юнага данціста». Марым выхаваць сваіх стаматолагаў.
— Як вы лічыце, стан здароўя зубоў у нашых дзяцей змяніўся з цягам часу?
— Так. Добра тое, што бацькі загаддзя хвалююцца, купляюць дзецям спецыяльныя дзіцячыя зубныя шчоткі і пасты, прыводзяць на прафілактычныя агляды. Акрамя таго, мы пастаянна працуем у дзіцячых садках і школах. Узровень стаматалагічнай граматнасці ў насельніцтва ўзрос. Дрэнна тое, што шмат мяккай, працёртай ежы. Патрэбна грызці моркву, яблыкі, капусту. Жаваць трэба. Зубы павіны працаваць, каб не атрафіравацца.
— Дзякуй, Валянціна Мікалаеўна, плённай Вам працы і дабрабыту ў сям’і.
Гутарку вяла Паліна Польская. Фота аўтара
