Каманда “Будаўнік” (Чэрвень), створаная на базе аднайменнага калектыву і мінскай “SQ.by-BELFIZA”, паспяхова выступіла ў пятым туры ХХ чэмпіянату Рэспублікі Беларусь па футзале, які прайшоў у Маладзечна.
У першай сустрэчы нашы спартсмены супрацьстаялі дзеючым чэмпіёнам краіны – камандзе “ВРЗ” з Гомеля.
Гамяльчане адкрылі лік ужо на трэцяй хвіліне матча. “Будаўнік” здолеў адыграцца незадоўга да перапынку, дзякуючы голу Антона Масько. У другім тайме нашы намаганнямі Аляксея Бялова і Андрэя Лапшына двойчы выходзілі наперад, але сапернікам удавалася забіваць мячы ў адказ. А за хвіліну з невялікім да фінальнага свістка пасля розыгрышу вуглавога Андрэй Лапшын магутным ударам скіраваў мяч у сетку варот “ВРЗ” і прынёс “Будаўніку” перамогу – 4:3.
У другім матчы чэрвеньцы сустракаліся з яшчэ адной гомельскай камандай – “БелГУТ”. Да перапынку “Будаўнік” вызначыўся тройчы (два мячы забіў Дзмітрый Чысты, адзін – Аляксей Бялоў), прапусціўшы ў свае вароты адзін гол за хвіліну да заканчэння першай паловы сустрэчы. У самым пачатку другога тайма гамяльчане скарацілі разрыў у ліку да мінімальнага – 2:3. Але ў далейшым нашы кантралявалі ход гульні і давялі яе да ўпэўненай перамогі – 6:2 (галы на рахунку Уладзіслава Дзмітрыевіча, Антона Масько і Аляксея Бялова).
Дзякуючы дзвюм перамогам, “Будаўнік” пасля пятага тура чэмпіянату з 19 ачкамі замацаваўся на трэцім радку ў турнірнай табліцы.
Ігар АДАМОВІЧ. Фота аўтара
Вынікі астатніх матчаў тура: Бабруйск” – “БелГУТ” – 4:3, “Аіст” – “Брэстутарчармет” – 1:2, “БелГУТ” – “ВРЗ” – 1:4, “Аіст” – “ВРЗ” – 3:1, “Брэстутарчармет” – “Бабруйск” – 4:3, “Бабруйск” – “Аіст”– 2:2.
Турнірная табліца чэмпіянату пасля пяці тураў
| Каманда | Г | В | Н | П | М | А |
| “Брэстутарчармет” | 13 | 13 | 0 | 0 | 57:14 | 39 |
| “ВРЗ” | 12 | 7 | 0 | 5 | 34:26 | 21 |
| “Будаўнік” | 12 | 6 | 1 | 5 | 28:32 | 19 |
| “Аіст” | 14 | 6 | 1 | 7 | 51:39 | 19 |
| “Бабруйск” | 13 | 4 | 2 | 7 | 35:52 | 14 |
| “БелГУТ” | 14 | 1 | 0 | 13 | 25:67 | 3 |
