Асабіста для мяне гэты год застанецца запамінальным на ўсё астатняе жыццё вельмі важнай падзеяй. Сталася ўсё, як у перадачы “Жди меня”.
Калі мне быў толькі адзін год, бацька пайшоў у войска, служыў пяць гадоў у Казахстане. Пасля службы дамоў не вярнуўся. Там ажаніўся, пражываў у г.Чымкенце. Мне давялося яго ўбачыць толькі два разы: першы, калі я вучылася ў чацвёртым класе, другі — у 21 год. Ён прыязджаў да сваіх бацькоў, якія жылі ў нашай вёсцы на Стаўбцоўшчыне. Шкадаваў, плакаў, што згубіў сваю сям’ю.
Бег час і нашы сувязі абарваліся. А сёлета мяне адшукалі бацькавы ўнукі, якія пражываюць у Расіі ў г.Белгарадзе. Сустрэча была нечаканай, цікавай. Праўда, ім давялося трохі паблудзіць: замест Смілавіч заехалі ў Смалявічы…
Ад іх я даведалася, што, акрамя мяне, у бацькі было яшчэ чацвёра дзяцей: дзве дачкі і два сыны. Памёр ён вельмі рана, у 53 гады. Маладымі памерлі і яго два сыны (самы старэйшы і самы малодшы). Засталіся дзве дачкі, якія жывуць у г. Чымкенце. Па расповяду ўнучкі я даведалася, што мой бацька быў вельмі добры, спакойны па характару чалавек, майстра на ўсе рукі і меў прыгожы почырк.
Госці наведалі шмат цікавых мясцін, ім вельмі падабалася чысціня і прыгажосць нашай краіны. А мне які быў гонар за сваю Беларусь! Цяпер з імі я падтрымліваю сувязь.
А ў надыходзячым годзе будзе другая адметная падзея — 45 гадоў як доўжыцца маё супрацоўніцтва з газетай “Раённы веснік”. Таму хачу шчыра павіншаваць увесь калектыў рэдакцыі з надыходзячым Новым годам, пажадаць здароўя, аптымізму, творчых поспехаў і актыўных аўтараў.
Няхай раёнка безумоўна
У хату кожную прыходзіць,
Цікавай будзе і змястоўнай
І чытачоў сваіх знаходзіць.
А калектыву пажадаю:
Здзяйснення мар, усіх даброт!
Няхай вас радасць сустракае,
Шчаслівым будзе кожны год!
А ўсім жыхарам раёна прысвячаю гэты верш:
Дні месяцы адлічваюць,
А месяцы — гады!
За справамі, за лічбамі
Спяшыць год малады.
Што прынясе ён кожнаму?
Не ведае ніхто.
Сняжынкі асцярожныя
Ляцяць на паліто.
Іду вясковай вуліцай:
У дамах зіхцяць агні…
А думкі просяць, туляцца:
Нястачы прагані.
Нясі, год, змены новыя,
Шмат радасных падзей.
Салюты каляровыя
І шчасце для людзей.
Дай болей ласкі, святасці,
Спагады, веры дай.
Настрою — прыўзнятасці,
Турбот не прыбаўляй.
Больш дзетак нараджаецца,
Пануе ў сем’ях лад.
Хваробы хай вяртаюцца
Адкуль прыйшлі назад.
Душа любоўю грэецца,
Шчыруе дабрыня.
Мы будзем жыць, надзеяцца
На лепшае штодня.
Дванаццаць набліжаецца…
Я чую ўжо здаля:
Зіма з “казой” вітаецца
І просіць да стала.
Раіса ВЕРАЦІЛА,
в. Жураўкавічы