Жыхар Чэрвеня Васіль Літвін стаў пераможцам творчага конкурсу, які правёў інтэрнэт-рэсурс 42.TUT.BY.
Паводле яго ўмоў, трэба было самым арыгінальным чынам сфатаграфаваць сябе на фоне лічбы «42» і выкласці здымак з подпісам у сваім Twitter-акаўнце. Васіль накіраваў на конкурс сэлфі з веласіпедам на фоне кіламетровага знака «42» з подпісам «Яшчэ # 42tutby кіламетры і я, не зважаючы на холад і вецер, прыеду да ittutby за новым смартфонам!».
Падчас інтэрнэт-галасавання фотаздымкі нашага земляка і яшчэ аднаго канкурсанта набралі па 145 галасоў і занялі 6-7 месцы. Аднак арганізатары спаборніцтва выявілі несумленныя метады барацьбы («накрутку» галасоў) у пяці першых удзельнікаў і дыскваліфікавалі іх.
У выніку ў фінале апынуліся Васіль і яго канкурэнт, які меў столькі ж галасоў. Пераможцу вызначыла лёсаванне, падчас якога ўдача ўсміхнулася нашаму земляку.
Паводле ўмоў конкурсу, ён атрымаў новы суперсучасны смартфон Apple iPhone 6.
— Я спадзяваўся на поспех, але, калі ўсё здарылася, доўга не мог паверыць, што перамог і выйграў тэлефон, які пачалі прадаваць у свеце ўсяго некалькі месяцаў таму, — распавёў Васіль. — Ідэю сфатаграфавацца на фоне кіламетровага знака падказала само жыццё. З 2011 года я захапіўся велатурызмам. Аб’ездзіў ужо ўсю Чэрвеньшчыну, вандрую па Беларусі і нават за яе межамі. А гэты здымак зрабіў на «магілёўцы», паміж Валевачамі і Смілавічамі.
Ігар АДАМОВІЧ. Фота з інтэрнэт-рэсурса 42.TUT.BY.
На здымку: тое самае конкурснае фота.
Поздравляю!)