На базе адпачынку “Церамок” ля вёскі Стары Пруд прайшла першая на Чэрвеньшчыне міжраённая выстава паляўнічых сабак.
Больш за 80 чацвераногіх гадаванцаў дэманстраваліся на трох рынгах. Найбольш шматлікай была група лаек – 55 сабак, асобна выстаўляліся ганчакі, трэцюю групу складалі тэр’еры, лягавыя і спаніэлі.
Па выніках экспертызы, падчас якой ацэньваліся знешні выгляд, экстэр’ер, іншыя асаблівасці сабак, паляўнічым выдавалі дакумент з пацвярджэннем адпаведнасці жывёлы прынятым стандартам і генетычным якасцям. Ставіліся і адзнакі: пераважная большасць сабак атрымала “вельмі добра” або “выдатна”.
Выстава выклікала цікавасць у аматараў палявання не толькі з нашага, Пухавіцкага, Смалявіцкага раёнаў, але і з Мінска, Асіповічаў. Эксперт рынгу Дзям’ян Хадатовіч адзначыў высокі ўзровень падрыхтоўкі і правядзення мерапрыемства, які забяспечыла раённая арганізацыя Беларускага таварыства паляўнічых і рыбаловаў пад кіраўніцтвам Уладзіміра Шарага.
Ігар АДАМОВІЧ.
Фота аўтара