Мы ўжо даўно планавалі паставіць агароджу вакол могілак вёскі Астравіты. Вяскоўцы таксама звярталіся з такой просьбай. Таму на працягу ўсяго летняга перыяду мы збіралі грошы на гэтыя мэты. Да таго ж, трэба было правесці і работы па добраўпарадкаванні — высекчы зараснікі, прыбраць шматгадовыя кучы смецця, паваленыя дрэвы, якія пачыналі ўжо гнісці…
У двух населеных пунктах — Дыі (у іх асобныя могілкі, але размешчаныя непадалёк ад могілак згаданай суседняй вёскі) і Астравітах — мы павесілі аб’явы аб маючым адбыцца там і там суботніку, зрабілі падворны абход з запрашэннем узяць удзел. Мерапрыемства па добраўпарадкаванні прызначылі на Дзяды, каб усе ахвотныя пасля прыбірання могілак сваіх родных і блізкіх маглі папрацаваць і на грамадскай тэрыторыі.
Непасрэдны ўдзел у суботніку ўзялі работнікі нашага сельвыканкама. Асобна працавалі рабочыя, якія ўстанаўлівалі плот. Прыемна, што і вяскоўцы адгукнуліся, прыйшлі на дапамогу. Мужчыны прыхапілі з дому сякеры і бензапілы. Бензінам іх забяспечваў сельвыканкам.
Вельмі ўразіў усіх нас Віктар Вяргейчык, які прыбыў на суботнік на экскаватары-пагрузчыку, выдзеленым бясплатна ПТУП «ТэхнаМюнстэр»! Дзякуючы гэтай тэхніцы мы змаглі прыбраць і кучы смецця, і вялізныя камяні, і спілаваць некаторыя дрэвы, якія ўжо нахіліліся і былі аварыйна небяспечнымі. Пасля гэтага і высякання зараснікаў на могілках вёсак Дыя і Астравіты з’явіліся ладныя прасветы.
Канешне, мы не паспелі зрабіць усё, што хацелі, але большую частку запланаванага выканалі. Сардэчна дзякую тым вяскоўцам, хто ўзяў актыўны ўдзел у суботніку. У вёсцы Дыя гэта — Рыгор Задзіран, Надзея Вяргейчык, Аксана Лісіца, Марыя Папова, Лідзія Бандарык, Валянціна Суша, у в.Астравіты — Мая Мажутка, Уладзімір Канапака (працаваў з бензапілой), Пётр Андрончык, Васіль Трыпуз, Аляксандр Вяргейчык (працаваў з бензапілой)… І многія іншыя жыхары гэтых вёсак і г.Мінска, якія на Дзяды прыехалі да родных магіл і згадзіліся папрацаваць на грамадскай тэрыторыі. Разам з вамі мы зрабілі богаўгодную справу! І, вядома, ушанавалі памяць тых, хто пахаваны. Зразумела, што ў сваёй працы мы абапіраемся на людзей. А больш нам, па сутнасці, няма на каго разлічваць…
Карыстаючыся момантам, звяртаюся не толькі да жыхароў свайго Чэрвеньскага сельсавета, а і ўсяго раёна, бо праблема гэтая сапраўды датычыць усіх. Шаноўныя, калі вы прыязджаеце і прыходзіце, каб прыбраць месцы пахавання сваіх родных, блізкіх, знаёмых, сяброў, суседзяў, калі ласка, выкідвайце смецце толькі ў прызначаныя для гэтага месцы! І пажадана — не пад самы плот. Справа ў тым, што смецце на ўсіх вясковых могілках прыбіраецца толькі сіламі работнікаў сельвыканкама.
У якасці прыкладу возьмем пахаванне вёскі Астравы. Тэрыторыя вялізная. І звычайна некаторыя людзі, якім далёка несці смецце ў прызначанае месца, выкідваюць яго проста за плот. І такія стыхійныя сметнікі вырастаюць у месцах дваццаці, не меней, у тым ліку — і з боку дарогі. І калі тэхніку для ліквідацыі смецця ў прызначаным месцы — пагрузчык і машыну — мы просім звычайна ў «Райаграсервісе», дык у выпадку з’яўлення стыхійных звалак даводзіцца браць у рукі сахор і самім смецце збіраць, грузіць і звозіць. Бывае, прычэп даводзіцца чапляць нават да сваёй машыны.
Таму давайце ўсё ж, па-першае, паважаць працу іншых, а па-другое, не ператвараць святыя месцы пахавання і тэрыторыі вакол іх у сметнікі. Па прынцыпу: няхай ляжыць абы-дзе, толькі не каля могілак, над якімі апякуемся. Пасля вашага прыбірання пахаванняў, шаноўныя, чысціня і парадак павінны быць вакол, каб вы нікому не стваралі лішніх праблем.
Наталля СВІРЫДОВІЧ,
старшыня Чэрвеньскага сельвыканкама.
Фота аўтара
Здымкі зроблены на могілках в.Астравіты