Ураджэнец Чэрвеня касманаўт Алег Навіцкі прызнаны медкамісіяй абсалютна годным для наступнага палёту ў космас.
Пра гэта ён паведаміў на нядаўняй сустрэчы са сталічнымі студэнтамі і школьнікамі, якія адбылася ў Мінскім планетарыі.
Паводле звестак інфармацыйнага агенцтва «Мінск-Навіны», Алег Навіцкі дэталёва распавёў удзельнікам сустрэчы аб працэсе адбору ў атрад касманаўтаў, нюансах падрыхтоўкі экіпажа і карабля да запуску, пра палёт, працу на станцыі і прызямленне. Свой аповед касманаўт дапоўніў прэзентацыяй, ілюстраванай шматлікімі фатаграфіямі, у тым ліку і зробленымі на Міжнароднай касмічнай станцыі.
Адметна, што Алег Навіцкі прайшоў шлях ад залічэння ў атрад касманаўтаў да палёту за рэкордны час — шэсць гадоў. Многія касманаўты чакаюць старту 12 і нават 16 гадоў.
Алег Навіцкі неаднойчы заяўляў, што марыць зноў узняцца да зор. Пасля станоўчага заключэння медкамісіі наш зямляк на крок наблізіўся да здзяйснення мары.
Ігар АДАМОВІЧ
