Футбол. Чэмпіянат Мінскай вобласці. 1 ліга. 25 тур.
«Зорка-РФОЦ-Вікторыя» (Мар’іна Горка) — «Колас» (Чэрвень) — 1:3.
26 кастрычніка. Мар’іна Горка. Гарадскі стадыён. Пераменная воблачнасць. 10 градусаў. 50 гледачоў.
«Колас»: Курыловіч, Аладка, Цэдрык, Мельцар, Качановіч, Красоўскі, Суша, Кулеш, Лаўрык (Прытыка, 85), Слыхоўскі, Мрынскі.
Галы ў «Коласа»: Курыловіч (14 — з пенальці), Мрынскі (30, 61).
У мінулую суботу футбалісты чэрвеньскага «Коласа» правялі ў Мар’інай Горцы апошні выязны матч сёлетняга чэмпіянату.
Гульня з мясцовай «Зоркай-РФОЦ-Вікторыяй» была надзвычай прынцыповай не толькі па прычыне традыцыйнага саперніцтва з геаграфічнымі суседзямі. Ад яе выніку залежала далейшае турнірнае становішча каманд. Перад гэтай сустрэчай абедзве яны мелі аднолькавую колькасць ачкоў — 16. Праўда, чэрвеньцы апярэджвалі мар’інагорцаў за кошт перамогі над імі на сваім полі ў першым крузе — 1:0.
Маючы небагатую «лаўку» запасных на гэты матч, нашы футбалісты абралі тактыку гульні «ад абароны» з разлікам на хуткія контратакі. І яна сябе цалкам апраўдала.
Гаспадары поля са стартавым свістком населі на вароты «Коласа», але ўжо на 14-й хвіліне атрымалі гол у свае: адзін з ігракоў «Зоркі» не па правілах спыніў у сваёй штрафной пляцоўцы Аляксандра Мрынскага, і наш галкіпер Аляксандр Курыловіч ужо другі раз у гэтым сезоне бездакорна прабіў пенальці.
На зыходзе паўгадзіны гульні чэрвеньцы замацавалі поспех. Гэта Сяргей Качановіч з глыбіні поля дакладным пасам вывеў Аляксандра Мрынскага сам насам з варатаром мар’інагорцаў. Дуэль выйграў наш нападаючы — 2:0.
Інтрыга ў матчы адрадзілася пасля таго, як неўзабаве пасля перапынку суддзя зноў паказаў на «кропку», цяпер ужо ў нашай штрафной, і госці рэалізавалі 11-мятровы. Але футбалісты і балельшчыкі «Зоркі» цешыліся нядоўга. Яшчэ праз 10 хвілін герой матча Аляксандр Мрынскі паўтарыў выніковы сольны праход да варот саперніка — 3:1. Гэтым разам яму асісціраваў Ігар Слыхоўскі.
Лік матча мог стаць зусім разгромным для каманды з Мар’інай Горкі, калі няўрымслівы Аляксандр Мрынскі на чацвёртай дададзенай да асноўнага часу гульні хвіліне зноў выйшаў на рандэву з галкіперам гаспадароў поля. Але прабіць па варотах яму перашкодзіў фінальны свісток арбітра.
Сёння «Колас» правядзе на гарадскім стадыёне ў Чэрвені апошнюю гульню ў чэмпіянаце з «Забудовай-2007» (Маладзечанскі раён). Пачатак у 14 гадзін.
Становішча каманд пасля 25 тура:
Г В Н П М А
«Узда» 23 17 5 1 64-26 56
«Жодзіна-2007» 22 17 4 1 54-17 55
«Маладзечна-
ДЮСШ-4» 23 16 1 6 62-31 49
«Нёман-Агра»
(Стоўбцы) 23 15 1 7 72-43 46
«Аграсервіс» (Слуцк) 23 12 3 8 56-43 39
«Клецк» 23 11 1 11 57-55 34
«Старыя Дарогі» 23 11 1 11 40-51 34
«Лівадыя-Юні»
(Дзяржынск) 22 11 0 11 65-35 33
«Беразіно» 23 6 2 15 28-64 20
«Колас» (Чэрвень) 23 6 1 16 34-76 19
«Забудова-2007»
(Маладзечанскі раён) 22 5 1 16 41-70 16
«Зорка-РФОЦ-
Вікторыя» (М. Горка) 23 4 4 15 28-51 16
«Вілія» (Вілейка) 23 3 4 16 31-70 13
Ігар АДАМОВІЧ
