Атрыманы другі том кнігі маладога гісторыка Дзмітрыя Дразда «Землеўладальнікі Мінскай губерніі». Гэты даведнік зацікавіць асабліва тых, хто распрацоўвае радавод сваёй сем’і. Зазначу, што Мінская губернія ў ХІХ стагоддзі была падзелена на 9 паветаў: Бабруйскі, Барысаўскі, Ігуменскі, Мінскі, Мозырскі, Навагрудскі, Пінскі, Рэчыцкі і Слуцкі.
Вось што распавяла старшы навуковы супрацоўнік Чэрвеньскага раённага краязнаўчага музея Ірына Вабішчэвіч:
— У двух тамах знаходзяцца падрабязныя звесткі аб жыхарах Міншчыны, якія мелі зямельныя надзелы з 1861 па 1917 год. У алфавітным парадку размешчаны прозвішчы землеўладальнікаў, памеры зямельных надзелаў, маюцца спасылкі на архіўныя матэрыялы, якія датычаць названых людзей або маёнткаў.
Вядома, кніга адрасавана, у першую чаргу, даследчыкам, чыя навуковая праца патрабуе прыведзеных звестак. Але не толькі навукоўцы з нецярпеннем чакалі выдання такога даведніка. У апошні час узрасла цікаўнасць жыхароў нашай краіны да ўласных каранёў, многія з іх хочуць ведаць аб тым, дзе жылі іх продкі, чым займаліся, ці мелі шляхетнае паходжанне. Ёсць такія зацікаўленыя людзі і ў нашым раёне. Артыкулы на вышэйназваную тэму часта друкуюцца на старонках «Раённага весніка».
Цяпер кожны жыхар горада і раёна можа завітаць у краязнаўчы музей, заказаць у фондавым аддзеле кнігу «Землеўладальнікі Мінскай губерніі», зрабіць неабходныя выпіскі, а потым працягнуць пошукі ў архівах, дакладна ведаючы нумары архіўных спраў. А супрацоўнікі музея змогуць дапамагчы людзям, якія дасылаюць у музей пісьмовыя запыты. Дарэчы, адказ на такі запыт ужо накіраваны Эмілію Шастакоўскаму ў ЗША. Ён шукае сваіх продкаў, якія мелі прозвішча Змачынскія і напачатку стагоддзя жылі ў Ігуменскім павеце.
Пагартаўшы другі том гэтага адметнага даведніка, я знайшла ў ім і сваё прозвішча. Магчыма, сярод тых людзей былі і мае продкі. Ёсць шанс даведацца, паколькі ў кнізе змешчаны дакладныя нумары архіўных спраў. Дзякуй аўтару выдання.
Эма МІКУЛЬСКАЯ.
Фота аўтара