Дэпутат Палаты прадстаўнікоў Нацыянальнага сходу Рэспублікі Беларусь, старшыня Пастаяннай камісіі па аграрнай палітыцы Віктар Шчэцька правёў прыём грамадзян у Чэрвені. У гутарцы з жыхарамі раёна ўдзельнічалі старшыня райвыканкама Іван Муха, прадстаўнікі раённых службаў і іншыя зацікаўленыя.
Жыхары Чэрвеньшчыны звярталіся з праблемамі як грамадскімі, так і асабістымі — наконт льготнага крэдытавання, водазабеспячэння, выкупа і пакупкі дамоў і інш.
Жыхар вёскі Хвойнікі выказаў занепакоенасць аб’ёмамі вытворчасці прадукцыі сельскай гаспадаркі:
— Мне зразумела ваша заклапочанасць, — адзначыў Віктар Шчэцька. — Вы выказаліся ў тым духу, што сельская гаспадарка раней вырабляла шмат. І свінафермы, і птушнікі былі. І вы гэты перыяд, вядома, хваліце. Але той перыяд прайшоў — сёння павінна працаваць тэхніка. У краіне няма ні аднаго птушніка — ёсць птушкафабрыкі. Смалявіцкая за 9 месяцаў выпусціла 50 тысяч тон мяса. Я лічу, што не павінна быць і свінагадоўчых ферм — ёсць свінакомплексы і на 50 тысяч галоў адкорму ў год, і на 108 тысяч…
Многія пытанні, якія агучваліся падчас прыёму грамадзян, тычыліся жыллёвай сферы. Так, жыхарка гарадскога пасёлка Смілавічы цікавілася домам па вуліцы Максіма Горкага — там працякае дах. Сітуацыю патлумачыў дырэктар жыллёва-камунальнай гаспадаркі Ігар Навіцкі:
— Мы толькі прынялі на баланс гэты дом — 2 ліпеня. Там неабходна перакласці каля 300 квадратных метраў руберойда. Аб’ёмы вызначаны, распрацаваны графік, працуем згодна з ім.
Іван Муха даручыў завяршыць работу ў верасні і ўзяў гэта пытанне на асабісты кантроль.
Падчас прыёму грамадзян 11 чалавек агучылі пытанні. На адны з іх адразу ж дадзена тлумачэнне. З другімі — старшыня райвыканкама даручыў разабрацца адпаведным службам раёна. Пытанні па льготнаму крэдытаванню на рэканструкцыю Віктар Шчэцька разгледзіць асабіста.
Сняжана КАЎГАРЭНЯ. Фота аўтара