З набліжэннем новага навучальнага года многія бацькі заклапочаны тым, як сабраць дзіця ў школу. Адны толькі прыглядваюцца да кошту школьных рэчаў, іншыя — набылі ўсё патрэбнае і, як кажуць, спяць са спакойнай душой.
Між тым, жыхары Чэрвеньшчыны могуць не турбавацца: у мясцовых крамах можна купіць неабходныя рэчы для школьнікаў — ад канцылярскіх тавараў да адзення і абутку. Напрыклад, у краме «Ігуменскі» кошт касцюмаў для хлопчыкаў складае ад 400 да 800 тысяч рублёў, касцюмы для дзяўчынак абыдуцца ў 300 — 600 тысяч рублёў. Дарэчы, у абутковай краме «Імідж» цэны засталіся яшчэ з мінулага года — вагаюцца ад 140 да 300 тысяч рублёў.
Кацярына Русецкая:
— Сёлета наш сын ідзе ў першы клас. Таму да падрыхтоўкі мы паставіліся сур’ёзна. Узялі ў школе спіс з патрэбнымі рэчамі для першакласніка. Зараз усе канцтавары, партфель, школьная форма ўжо купленыя. Дарэчы, касцюм набылі ў краме «Ігуменскі». Астатняе — у Мінску на школьным базары. Зараз старанна займаемся падрыхтоўкай да вучобы: лічым, чытаем, пішам. А наконт школьных рэчаў скажу так: выбар ёсць усюды, былі б толькі грошы!
Наталля Краснагір:
— Сыну купілі амаль усё да школы. Набывалі патрэбныя рэчы ў Чэрвені. Засталіся яшчэ неабходныя канцтавары: сшыткі, алоўкі і г.д. Думаю, з гэтым не будзе ніякіх складанасцей. Нам крыху лягчэй, бо партфель і школьная форма засталіся з мінулага года.
Аляксей Забаронак:
— Наш сын у поўнай меры падрыхтаваны да навучальнага года. Штосьці засталося з мінулага, штосьці прыйшлося купляць. Напрыклад, касцюм набылі новы, канцтавары таксама. Хлопец расце, таму без новых рэчаў амаль не абысціся. Заўважыў, што ў Мінску большы выбар, і можна падабраць самы бюджэтны варыянт.
Размаўляла Кацярына ШУМКО. Фота аўтара
