У эксперыментальнай базе «Натальеўск» справілі «Зажынкі».
На пляцоўцы перад машынным дваром гаспадаркі, бы салдаты, выстраіліся ў шарэнгу камбайны і аўтамашыны для адвозкі збожжа. А паперадзе іх — галоўныя дзеючыя асобы жніва — экіпажы камбайнераў і вадзіцелі.
З пачаткам уборкі зерневых іх павіншавалі першы намеснік старшыні райвыканкама, начальнік упраўлення сельскай гаспадаркі і харчавання Іван Малахаў, дырэктар гаспадаркі Алена Махнач, старшыня Калодзежскага сельвыканкама Людміла Пасудзеўская.
Неад’емнымі атрыбутамі ўрачыстасці былі традыцыйныя вянкі і снапкі з калосся новага ўраджаю, караваі і звонкія песні.
А праз колькі хвілін пасля таго, як адгаманіла свята, камбайны дружна рушылі ў поле. Бы па раўчуку, што дае пачатак рацэ, паплылі яны па вузкай палосцы трыцікале за агароджай машыннага двара поруч з магілёўскай шашой. А праз сотню-другую метраў палетак раздаўся ўшыркі, як акінуць вокам, бурштынавым морам збажыны.
Фота аўтара