У снежні 1970 года Мінская вобласць была ўзнагароджана другім ордэнам Леніна за поспехі, дасягнутыя працаўнікамі Міншчыны ў выкананні заданняў восьмага пяцігадовага плана па развіццю прамысловасці і сельскагаспадарчай вытворчасці.
Уручалі гэтую высокую ўзнагароду на ўрачыстым сходзе ў Палацы афіцэраў у Мінску. У ім бралі ўдзел дэлегацыі з усіх раёнаў вобласці. А з нашага — яшчэ і хор культработнікаў. У яго ўваходзілі выкладчыкі Чэрвеньскай музычнай школы, настаўнікі спеваў школ і дзіцячых садкоў Чэрвеня, работнікі раённага Дома культуры, бібліятэкі.
Кіраваў гэтым самабытным творчым калектывам дырэктар музычнай школы Васіль Капцелаў. На здымку (злева направа) ён дзевяты ў другім радзе. Акампаніятары — выкладчыкі музычнай школы Барыс Тунік і Васіль Мукавозчык (на здымку злева направа).
Прыемна ўзгадаць, што ў той час у нашым раёне было шмат харавых калектываў: у Смілавічах, Заполлі, Турцы, Грабёнцы, Волме, Раванічах, Хутары, раённай бальніцы, тубдыспансары, аўтабазе, таварыстве сляпых, райспажыўтаварыстве, дзіцячым інвалідным інтэрнаце. Усе яны актыўна ўдзельнічалі ў раённых аглядах мастацкай самадзейнасці.
Анатоль ТУРБАЛ, г.Чэрвень