Конкурс сацыяльных работнікаў

«ДЗЯЎЧАТЫ, ГЭТА ВАША ПЕРАМОГА!» Такія словы давялося пачуць не раз падчас падвядзення вынікаў. Гэтак казалі пераможцы і прызёры, удзельнікі конкурсу «Лепшы па прафесіі сацработнік-2012», звяртаючыся да сваіх брыгадаў. Яно і не дзіўна, бо апрача двух індывідуальных этапаў конкурсу, у астатніх чатырох у якасці групы падтрымкі выходзілі менавіта брыгады, і практычна ў поўным складзе. І ўсё ж кожная выбрала сваіх прадстаўнікоў, якія абаранялі гонар усіх калег. У выніку атрымалася 10 канкурсантак.Лядзенскі сельсавет прадстаўляла Жанна НАВАК, аб’яднаны Кліноцкі і Чэрвеньскі — Галіна ГОРГУН, Чэрвеньскі асобна — Святлана МАТУСЕВІЧ, Валевачоўскі — Ніна БОРШЧ, Калодзежскі — Таццяна МАКСІМЕНКА і Святлана КАЦЬКО, Раваніцкі — Таццяна ШАТРУН, Руднянскі — Зінаіда ІГНАЦЕНКА, г.Чэрвень — Анжэла ПАНКРАТАВА, г.п.Смілавічы — Ірына ГОЛУБ.

У першым этапе конкурсу ўдзельніцы пры падтрымцы і дапамозе брыгад прадстаўлялі візітоўку, дзе трэба было раскрыць сутнасць сваёй працы з дапамогай дэвізу, эмблемы, аповеду… Прыемна было бачыць, што многія прыдумалі сабе форму. Напрыклад, чорныя спадніцы ці штаны, а зверху белыя альбо чырвоныя кофты і блузкі. Меліся і маляўнічыя эмблемы. Гучалі кранальныя вершы, у тым ліку і ўласнага сачынення — як у брыгадзіра брыгады Кліноцкага і Чэрвеньскага сельсаветаў Алены Сязончык. А брыгада Чэрвеньскага сельсавета так задорна і аптымістычна праспявала «Не кочегары мы, не плотники…», што зарабіла цэлы шквал апладысментаў! Брыгада Валевачоўскага сельсавета выйшла з паветранымі шарыкамі, з якіх склалі слова «Валевачы».

У конкурсе «Сітуацыя» ўдзельнікі павінны былі даць ацэнку той сітуацыі, якую выцягвалі ў білеце, і распавесці пра свае канкрэтныя дзеянні па яе вырашэнні. Многім заданні падаліся цяжкаватымі. Давялося спраўляцца пры дапамозе членаў журы — дырэктара Чэрвеньскага тэрытарыяльнага цэнтра сацыяльнага абслугоўвання насельніцтва Людмілы Шарковай, загадчыцы аддзялення сацыяльнай дапамогі на даму Таццяны Адзінец, загадчыцы аддзялення дзённага знаходжання для інвалідаў, старшыні прафкама Валянціны Кацько. У выніку правільна, упэўнена і самастойна з сітуацыяй здолелі справіцца толькі Святлана Матусевіч (Чэрвеньскі сельсавет) і Ірына Голуб (г.п.Смілавічы).

Яшчэ больш сур’ёзным стаўся трэці конкурс — «Эрудыт», дзе трэба было хутка і правільна выбраць патрэбны адказ з прапанаваных да пытанняў тэсту. Датычыліся яны нарматыўна-прававой асновы сацыяльнай работы. І тут таксама ўдзельніцамі дапускаліся памылкі.

А далей конкурсы пайшлі — адзін цікавей за другі! Яшчэ да пачатку спецыяльна падрыхтаваныя сталы заставілі рознымі стравамі. А ў конкурсе «Кулінарны паядынак» раскрывалі іх назву, рэцэпт, сакрэты прыгатавання, у тым ліку і ў вершах. Якіх толькі адмысловасцяў тут ні было! Салата «Башмак» і «Сланечнік», заліўное «Жар-птушка», каравай, тарты вагою ў некалькі кілаграмаў (!), заліўная рыба, рулеты і пячэнне, хатняя курыца пад маянэзам, заліўное ў выглядзе… парсючка, хатнія нарыхтоўкі… Словам, хоць зараз усе — на самы прадстаўнічы конкурс повараў!

Падчас конкурсу «Умелые руки не знают скуки» журы ацэньвала творчыя вырабы сацыяльных работнікаў, загадзя размешчаныя на сцэне. Дарэчы, папрацавалі над імі не толькі брыгады, але і дзеці, мужы, іншыя родзічы… Пры багатай разнастайнасці тэхнік, якімі, здаецца, ужо нікога не здзівіш, усё ж былі тут і маленькія адкрыцці. Гэта знайшло сваё адлюстраванне ў адзнаках, выстаўленых членамі журы канкурсантам.

І нарэшце надышла чарга апошняга, самага відовішчнага конкурсу — «Музычна-паэтычнага». Даўно не бачыла столькі талентаў разам. Было тут усё: вершы, песні, прыпеўкі, спевы пад гітару… Але самае яркае — канешне ж, міні-прадстаўленні. Калі ад смеху гледачы складваліся літаральна папалам, выціралі слёзы, размазваючы туш, апладзіравалі, не шкадуючы далоняў, выгуквалі: «Малайцы! Брава!»…

Усе пастаноўкі датычыліся ўласнай працы. Брыгада Раваніцкага сельсавета паказала сацработніка ў бабулі-скнары, для якой давялося варыць «суп з сякеры». Брыгада Валевачоўскага — абыграла байку Кандрата Крапівы «Дзед і баба», выйшаўшы на сцэну з цацачным конікам, які дадаў каларыту. Брыгада Калодзежскага — паказала, як дзед бабу на базары прадаваў, перарабіўшы вядомае на новы лад. Прадстаўнікі Смілавічаў пасмяшылі сцэнкай «Чый дзед?!», Руднянскага — «новымі рускімі» дзедам ды бабай. А брыгада г.Чэрвеня па-новаму прадставіла бачанне вядомай песенькі «Все хорошо, прекрасная маркиза», а затым — варыяцыю на тэму «Три девицы под окном». Вось дзе было смеху! А які выраз твару артыстаў, як натуральна пераўвасобіліся! Словамі не перадаць, трэба бачыць!

Пасля вясёлага заканчэння конкурсу сацработнікаў распачаўся конкурс брыгадзіраў, які складаўся ўсяго з дзвюх частак — «Візітоўкі» і «Эрудыта». Тут на сцэну ўзнімаліся і дэманстравалі ўзровень тэарэтычных ведаў Наталля МАНУЛІК (Лядзенскі сельсавет), Алена СЯЗОНЧЫК (Кліноцкі і Чэрвеньскі), Ларыса ШЧАКАЛА (Чэрвеньскі), Ірына ЮДО (Валевачоўскі), Галіна МАРКОЎСКАЯ і Алена ПАБЯДЗІНСКАЯ (абедзве з Калодзежскага сельсавета, да якога раней, як вядома, далучылі Хутарскі), Святлана ГУРСКАЯ (Раваніцкі), Святлана РУДАМЁТКІНА (Руднянскі), Любоў НЯХАЙ (г.Чэрвень) і Святлана ЖУК (г.п.Смілавічы).

Па ўмовах конкурсу, уладальніка першага месца чакала прэмія ў памеры пяці базавых велічынь, другога — чатырох і трэцяга — трох базавых велічынь. Узнагарода пераможцы конкурсу брыгадзіраў — тры базавыя. Ну, а прафкам падрыхтаваў пераможцам і прызёрам кветкі, а таксама прэміі ў памеры адной, 0,75 і 0,5 базавай велічыні за першае, другое і трэцяе месцы адпаведна, брыгадзіру-пераможцы — 0,75 базавай.

Сярод сацработнікаў трэцяе месца заваявала Таццяна ШАТРУН з Раваніцкага сельсавета, другое — Ірына ГОЛУБ з г.п.Смілавічы. А лепшым сацработнікам-2012 прызнана Ніна БОРШЧ з Валевачоўскага сельсавета. Лепшым брыгадзірам стала Наталля МАНУЛІК з Лядзенскага сельсавета.