22 студзеня 1796 года г.Ігумен атрымаў свой герб.
31 студзеня 1889 года смілавіцкі мешчанін Вульф Гельфанд атрымаў рэзалюцыю Мінскага губернскага праўлення, якая дазваляла яму адкрыццё ў Смілавічах установы для прыгатавання прахаладжальных напояў.
1 студзеня 1913 года Ігуменскае 4-х гадовае гарадское вучылішча было ператворана ў вышэйшае пачатковае вучылішча, якое знаходзілася ў асабістым будынку па вуліцы Школьнай. Пабудавана яно было на сродкі гарадской казны.
1 студзеня 1916 года ў в.Бярозаўка Чэрвеньскага раёна нарадзіўся Мікалай Міхайлавіч Казачэнка, удзельнік Вялікай Айчыннай вайны, Герой Савецкага Саюза.
У студзені 1919 года выйшаў першы нумар раённай газеты «Известия Игуменского исполкома».
Студзень 1943 года. Карная аперацыя фашыстаў пад кодавай назвай «Франц» супраць партызан і мірнага насельніцтва ў Чэрвеньскім, Асіповіцкім, Бярэзінскім, Пухавіцкім раёнах. Расстраляна, павешана, спалена жывымі больш за 2000 чалавек, больш 1000 чалавека ўгнаны ў Германію.
Студзень 1945 года. У Чэрвені для хутчэйшага вырашэння кадравых праблем адкрыты двухтыднёвыя курсы па падрыхтоўцы брыгадзіраў паляводчых брыгад, а ў Чэрвеньскай МТС навучаліся трактарысты.
2 студзеня 1947 года ў г.Чэрвені нарадзіўся майстар спорту, алімпійскі чэмпіён Валерый Пятровіч Шары.
2 студзеня 1951 года ў г.п.Смілавічы нарадзіўся беларускі гісторык, доктар гістарычных навук, прафесар, выдатнік народнай адукацыі БССР Анатоль Міхайлавіч Люты.
2 студзеня 1974 года памёр мастак Міхась Пятровіч Станюта, ураджэнец г.Ігумена.
7 студзеня 1991 года. Першая служба ў Свята-Мікалаеўскай царкве Чэрвеньскага прыхода (праваслаўнага веравызнання).
1 студзеня 1992 года Чэрвеньскі райвыканкам прыняў рашенне аб адкрыцці раённага краязнаўчага музея.
(Па матэрыялах Чэрвеньскага раённага краязнаўчага музея)
