Мікалай Міхайлавіч КУЛАЧОК родам з Украіны. Пасля заканчэння школы прыехаў у Беларусь, каб прадоўжыць вучобу ў Пінскім індустрыяльна-педагагічным тэхнікуме. Пасля яго заканчэння па размеркаванні трапіў на працу ў Смілавіцкае СПТВ. Скончыў БНТУ па спецыяльнасці «інжынер-механік». Лёс распарадзіўся так, што Беларусь стала для яго другой радзімай. І вось ўжо 40 год Мікалай Міхайлавіч працуе з дзецьмі, з іх 25 — настаўнікам працоўнага навучання ў СШ №2 г.п.Смілавічы.
Прадметныя ўрокі, якія праводзіць Мікалай Міхайлавіч Кулачок, — гэта і ўрокі жыцця, надзейны компас для яго выхавання. На ўроках таленавітага настаўніка — цікавых, творчых — вучням няма калі сумаваць. Ён любіць прыдумваць штосьці новае, каб захапіць працай усіх.
Яго вучні неаднаразова станавіліся пераможцамі і прызёрамі рэспубліканскай алімпіяды і агляду-конкурсу дэкаратыўна-прыкладнай творчасці. Сакрэт яго майстэрства ў тым, каб аддаваць дзецям часцінку сваёй душы, не спыняцца на дасягнутым, а заўсёды крочыць наперад.
Мікалай Міхайлавіч мае заслужаны аўтарытэт сярод калег, вучняў і іх бацькоў. Яго праца адзначана Ганаровымі граматамі аблвыканкама і раённага аддзела адукацыі.
Людміла ДРАПЕЗА,
настаўніца беларускай мовы і літаратуры СШ №2 г.п.Смілавічы
