Чарговае пасяджэнне мы пачалі з разгляду пытання аб прызнанні дваіх непаўналетніх дзяцей маючымі патрэбу ў дзяржаўнай абароне. Увогуле, у гэтай сям’і трое дзяцей. Але старэйшы паўналетні ўжо, працуе, а двое — школьнікі. Сям’я знаходзіцца на ўліку даволі доўга. Усе зацікаўленыя структуры працавалі з маці. Былі ўжо і некаторыя паляпшэнні, але да канца выправіць сітуацыю так і не змаглі. Жанчына не працуе, злоўжывае спіртным. Дзеці, вядома, дужа церпяць у такой сітуацыі. Таму было прынята рашэнне аб забранні непаўналетніх з сям’і і змяшчэнні іх у сацыяльна-педагагічны цэнтр.
Так атрымалася, што наступнае рашэнне бы ўраўнаважвала папярэдняе: двое дзяцей былі вернуты ў біялагічную сям’ю, з якой таксама шмат працавалі па Дэкрэту №18.
Разгледжаны адміністрацыйныя справы ў адносінах да дарослых, якія неналежным чынам выконваюць свае бацькоўскія абавязкі. Так, у першым выпадку пратакол быў складзены на маці, чыя 12-гадовая дачка ўжывала спіртное ў грамадскім месцы. Абурае і насцярожвае ў гэтай сітуацыі той факт, што дзяўчынка сыходзіла з сям’і і свае кішэнныя грошы траціла на алкаголь, які, да таго ж, хтосьці з дарослых купляў… Улічваючы, што непаўналетняя — са шматдзетнай сям’і і на камісіі разглядаецца ўпершыню, было прынята рашэнне маці не штрафаваць, а папярэдзіць.
У другім выпадку пратакол складзены на маці, чые сыны, васьмі і дзесяці гадоў, здзейснілі пранікненне ў чужое жытло, а пасля яшчэ ўзялі каля крамы чужы веласіпед. За неналежнае выкананне сваіх бацькоўскіх абавязкаў маці павінна заплаціць штраф у памеры дзесяці базавых велічынь, а гэта — адзін мільён беларускіх рублёў.
Ажно тры адміністрацыйныя пратаколы складзены на аднаго непаўналетняга. За самастойна заробленыя грошы ён адрамантаваў стары аўтамабіль і кіраваў ім, не маючы вадзіцельскага пасведчання. У выніку здзейсніў наезд на жалезабетонны плот і пашкодзіў яго. Паколькі гэты непаўналетні дасягнуў узросту, з якога наступае адміністрацыйная адказнасць (яму 17 гадоў), то павінен сам заплаціць штраф у памеры 550 тысяч рублёў.
Падчас пасяджэння камісіі па справах непаўналетніх разгледжана пытанне аб стане злачыннасці і правапарушэнняў сярод непаўналетніх за дзевяць месяцаў гэтага года. Паводле інфармацыі інспекцыі па справах непаўналетніх Чэрвеньскага РАУС, дзецьмі і падлеткамі здзейснена 9 злачынстваў (за аналагічны перыяд мінулага года — 16), 87 адміністрацыйных правапарушэнняў (летась — 107), з іх 29 выпадкаў — гэта распіццё спіртных напояў у грамадскіх месцах (за 9 месяцаў летась — 36).
Дарэчы, нягледзячы на істотнае скарачэнне светлавога дня, на гэтае пасяджэнне камісіі не было прадстаўлена ніводнага пратакола па знаходжанні непаўналетніх на праезнай частцы ў цёмны час сутак без святловяртальных элементаў. Спадзяюся, што гэтае правіла ведаюць ужо ўсе. І не толькі ведаюць, а і захоўваюць, зберагаючы тым самым сваё здароўе і жыццё. Хочацца спадзявацца, што сёлета мы ўбачым мінімальную колькасць пратаколаў за такія правапарушэнні.
Наталля СЦЯЖКО,
намеснік старшыні камісіі па справах непаўналетніх райвыканкама