У мінулую суботу з ранку водар ляснога гаю каля вёскі Іванічы поўніўся шматлікімі галасамі. Тут у чарговы раз згодна распараджэння старшыні райвыканкама Івана Муха праводзіліся традыцыйныя спаборніцтвы санітарных і добраахвотных пажарных дружын. Гэтае мерапрыемства з”яўляецца састаўной часткай Плана асноўных мерапрыемстваў па падрыхтоўцы органаў кіравання і сіл Чэрвеньскага раённага звяна Дзяржаўнай сістэмы папярэджвання і ліквідацыі надзвычайных сітуацый і грамадзянскай абароны.
Пасля каманды “смірна” камандзіры дружын далажылі аб гатоўнасці да спаборніцтваў. Узняць сцяг было прадастаўлена мінулагоднім пераможцам — камандзе сандружыны КСУП “Эксперыментальная база “Натальеўск”.
Сёлета ў гэтым мерапрыемстве прымалі ўдзел 8 санітарных звенняў, 6 санітарных і столькі ж добраахвотных пажарных дружын. Медыцынскія фарміраванні дэманстравалі веды па аказанню дапамогі ў ачагах хімічнага, бактэрыялагічнага і ядзернага паражэння, паказвалі, як правільна надзяваць процівагаз, накладваць шыну, транспарціраваць пацярпелых, спыніць крывацек, праводзіць дызінфекцыю.
Удзельнікі пажарных каманд спаборнічалі ў спрыце і лоўкасці па хуткай ліквідацыі ачагоў пажару.
На конкурс былі прадстаўлены баявыя лісткі і нумары мастацкай самадзейнасці. Каманды спаборнічалі і па перацягванню каната.
У выніку пераможцамі прызнаны:
Сярод санітарных дружын — каманда ААТ “Чэрвеньскі райаграсервіс” (на здымку ўверсе). Другое месца — у каманды КСУП “Эксперыментальная база “Натальеўск”, трэцяе — у Смілавіцкага дзяржаўнага аграрнага каледжа;
Сярод санітарных звенняў — першае месца ў каманды ГЛХУ “Чэрвеньскі лясгас”, другое заняла каманда Чэрвеньскага гароднінасушыльнага завода, трэцяе — ААТ “Крыніца Ігуменшчыны”.
Сярод добраахвотных пажарных дружын лідэрам стала каманда ААТ “Раванічы”, другое Чэрвеньскага гароднінасушыльнага завода, трэцяе — у каманды ААТ “Запольскае”.
Лепшым прызнаны баявы лісток Чэрвеньскага дрэваапрацоўчага камбіната, а нумары мастацкай самадзейнасці — ААТ “Чэрвеньскі райаграсервіс”.
Дужэйшымі ў перацягванні каната — каманда ГЛХУ “Чэрвеньскі лясгас” .
Людміла РАБЕЦКАЯ.
Фота аўтара
