«Зорка-ЖКГ» (Мар’іна Горка) — «Колас» (Чэрвень) — 0:0.
19 мая. Мар’іна Горка. Гарадскі стадыён. Пераменная воблачнасць. 23 градусы. 100 гледачоў.
«Колас»: Курыловіч, Цэдрык, Камісаранка, Шмаянкоў, Люты, Суша, Шалабнёў (Бурмістронак, 85), Масько, Ліпніцкі (Хасяневіч, 88), Чысты (Канцур, 83), Яблонскі.
Футбольныя супрацьстаянні суседзяў — чэрвеньцаў і мар’інагорцаў — ва ўсе часы былі прынцыповымі. Справаздачны матч не стаў выключэннем.
Пасля двух тураў каманды замацаваліся на супрацьлеглых полюсах турнірнай табліцы: «Зорка-ЖКГ» — другая зверху, «Колас» — другі знізу. Цікавасць матчу надавалі і іншыя акалічнасці. Напрыклад, тое, што нашы футбалісты перайгралі мар’інагорскіх у таварыскім перадсезонным матчы на іх полі — 2:1. А перад гэтай гульнёй гаспадары поля ў кулуарах абяцалі выйграць у «Коласа» з буйным лікам.
Ужо ад пачатку матча чэрвеньцы засведчылі, што не збіраюцца ні ў чым саступаць саперніку. Свядома аддаўшы яму гульнявую ініцыятыву, ігракі «Коласа» раз-пораз вымушалі хвалявацца абарону гаспадароў поля, праводзячы вострыя контратакі. На жаль, старая хвароба, калі небяспечныя моманты ёсць, а галоў — няма, не дазволіла нашым ужо ў першым тайме забяспечыць сабе перавагу ў ліку. Спачатку вышэй варот прабіў Максім Шалабнёў, потым два разы запар не здолеў засмуціць варатара мар’інагорцаў Яўген Яблонскі.
Ну, а самым драматычным момантам матча стаў эпізод, калі на апошніх хвілінах гульні суддзя прызначыў у вароты «Коласа» даволі спрэчны адзінаццаціметровы. Падумалася: няўжо трэцюю гульню запар прайграем з лікам — 0:1? Не! Варатар і трэнер чэрвеньцаў Аляксандр Курыловіч парыраваў пенальці, стаўшы сапраўдным героем сустрэчы.
Такім чынам, «Колас» запісаў на свой рахунак першае ачко ў турнірнай табліцы. Канешне, малавата, але ўсё ж лепей, чым нічога.
Наступны матч чэмпіянату чэрвеньцы правядуць на сваім полі ў бліжэйшую суботу з камандай «Старыя Дарогі». Пачатак гульні — у 16 гадзін.
Ігар АДАМОВІЧ
Вынікі астатніх гульняў 3 тура: «Лівадыя-Юні» (Дзяржынск) — «Жодзіна-2007» — 4:1, «Іслач-2» (Мінскі раён) — «БСЗ» (Беразіно) — 1:1, «Нёман-Агра» (Стоўбцы) — «Аграсервіс» (Слуцк) — 2:1, «Забудова-2007» — «Клецк» — 1:0, «ДЮСШ-2-БДВАР» (Барысаў) — «Беліта-Вітэкс» (Узда) — 1:7 , «Старыя Дарогі» — «Вілія» (Вілейка) — 2:1.
Становішча каманд пасля трэцяга тура:
Каманды В Н П М А
«Лівадыя-Юні»
(Дзяржынск) 3 0 0 10:4 9
«Зорка-ЖКГ» (М. Горка) 2 1 0 3:1 7
«Беліта-Вітэкс» (Узда) 2 0 1 11-7 6
«Аграсервіс» (Слуцк) 2 0 1 3:2 6
«Старыя Дарогі» 2 0 1 6:6 6
«Неман-Агра» (Стоўбцы) 2 0 1 4:4 6
«Іслач-2» (Мінскі раён) 1 2 0 5:1 5
«Вілія» (Вілейка) 1 0 2 5:5 3
«Жодзіна-2007» 1 0 2 3:5 3
«Забудова-2007»
(Маладзечанскі раён) 1 0 2 3:5 3
«ДЮСШ-2″(Барысаў) 1 0 2 5:10 3
«БСЗ» (Беразіно) 0 1 2 2:4 1
«Колас» (Чэрвень) 0 1 2 0:2 1
«Клецк» 0 1 2 0:4 1
