На палетках вучэбна-вытворчай гаспадаркі дзяржаўнай установы адукацыі «Смілавіцкі дзяржаўны аграрны каледж» цешыць вока аксамітная рунь. Здаецца, што гэтую цудоўную прыгажосць стварыла чараўніца. А на справе — руплівыя і працавітыя рукі машыністаў-трактарыстаў, у першую чаргу Анатоля Мікалаевіча Лешука. Другі год запар дабіваецца ён вялікага поспеху ў працы. Ведае, як свае далоні, кожнае поле гаспадаркі, бо аддае ім не толькі свой працоўны імпэт, але і душэўнае цяпло.
Менавіта на яго раўняецца механізатар Андрэй Міхайлавіч Гец. Пераймае вопыт непасрэдна ў полі, у майстэрні. Невыпадкова і ў Андрэя Міхайлавіча праца спорыцца.
Як і паўсюдна ў рэспубліцы, на веснавых палявых работах адчувалася напружанне і ў нашай гаспадарцы, імкненне выканаць усё ў лепшыя агранамічныя тэрміны. Механізатарскі калектыў гаспадаркі невялікі. Таму вынікі дасягнуты не колькасцю занятых людзей, а якасцю працы гэтых двух рупліўцаў.
Кожны дзень, з самага рання і да змяркання шчыравалі яны ў полі разумеючы, што што вясновы дзень год корміць. У майстэрні затрымліваліся толькі на прафілактыку тэхнікі. Нават непоўны пералік выкананых імі работ уражвае: падкормка азімых, унясенне ў глебу мінеральных угнаенняў, падрыхтоўка глебы, сяўба яравых, зернебабовых, траў, бульбы і гэтак далей. Пастаянна выконвалі і перавыконвалі нормы выпрацоўкі пры высокай якасці агратэхнічных аперацый. Таму невыпадкова ў іх гонар палымнее сцяг на двары машына-трактарнага парка, а дырэктар каледжа Тамара Канстанцінаўна Сень аб’яўляла ім падзякі.
Зараз механізатары рыхтуюцца да выканання летніх агратэхнічных мерапрыемстваў.
КалеКтыў навучальнай установы ганарыцца сваімі перадавікамі.
Іван Ярашэвіч,
каледж, Смілавічы