З 21 да 28 красавіка па ініцыятыве Міністэрства лясной гаспадаркі ў Беларусі праходзіць акцыя «Тыдзень лесу-2012», прысвечаная Году кнігі і 130-годдзю з дня нараджэння класікаў беларускай літаратуры Янкі Купалы і Якуба Коласа. У нашым раёне яе адкрыццё адбылося ў Чэрвеньскім лясніцтве. У суботу на высечцы ўчастка лесу непадалёк ад вёскі Хвойнікі, які быў пашкоджаны ўраганам у 2010 годзе, пасадкай сеянцаў хвоі і елкі на плошчы 2,6 гектара займаліся дэпутаты раённага Савета дэпутатаў, работнікі райвыканкама, дзеці са школьнага лясніцтва СШ №4 Чэрвеня. Разам з імі ўдзел у акцыі брала старшыня Мінскага абласнога Савета дэпутатаў Святлана Герасімовіч.
Усяго ў гэты дзень у лясніцтвах раёна пасадзілі 148 тысяч сеянцаў і саджанцаў дрэў агульнай плошчай 26,7 гектара.
Ігар АДАМОВІЧ.
Фота аўтара