У нядзелю ў чацвёртай гарадской школе прайшоў першы этап спартакіяды працоўных калектываў раёна. У барацьбу за перамогу ўключыліся каманды чэрвеньскага будаўнічага ліцэя, смілавіцкіх аграрнага каледжа і сельгасліцэя, СДЮШАР, аддзела адукацыі райвыканкама, ПМК-237, райбальніцы, лясгаса, «Беларусбанка», дома-інтэрната для дзяцей-інвалідаў, раённых электрасетак, аддзела па надзвычайных сітуацыях, вузла электрычнай сувязі, спажывецкага таварыства, камунгаса, ААТ «Раванічы», «10 з’езд Саветаў» і «Запольскае».
У камандным заліку пераможцамі сталі: па шахматах і стральбе з пнеўматычнай вінтоўкі — аграрны каледж, па валейболу — раённыя электрасеткі, па гіравому спорту — ААТ «10 з’езд Саветаў», па настольнаму тэнісу — СДЮШАР.
У асабістым заліку першыя месцы занялі: Леанід Буйло з аграрнага каледжа і Галіна Ляшкова з «Беларусбанка»- па шахматах; Сяргей Варвашэвіч з сельгасліцэя, Віталь Луферчык і Сяргей Арганаў з «Беларусбанка», Іван Атрашэўскі і Іван Ігумнаў з ААТ «10 з’езд Саветаў» — па гіравому спорту; Алена Прадзед з аграрнага каледжа — па стральбе; Віктар Ганчарык з раённага вузла электрычнай сувязі і Аксана Даўгаполава з аддзела адукацыі райвыканкама — па настольнаму тэнісу.
Другі этап спартакіяды адбудзецца ў бліжэйшую нядзелю ў Чэрвеньскім прафесійным будаўнічым ліцэі. У праграме спаборніцтваў — міні-футбол, армрэслінг, шашкі, дартс і перацягванне каната.
МЯЧ НАД СЕТКАЙ
У спартыўнай зале Смілавіцкага сельскагаспадарчага прафесійнага ліцэя прайшоў валейбольны турнір памяці воінаў-інтэрнацыяналістаў. Удзел у ім бралі 9 каманд: дзве — з сельгасліцэя, тры — са Смілавіцкага аграрнага каледжа, а таксама «Юнацтва» з Новых Зелянькоў, выпускнікі Хутарскай школы, моладзь вуліцы Барыкіна з Чэрвеня і каманда «Беларусбанка».
Перамагла ў спаборніцтвах першая каманда сельгасліцэя. Другое месца заняла трэцяя каманда аграрнага каледжа, трэцяе — «Юнацтва» з Новых Зелянькоў.
Пераможцы турніру ўзнагароджаны медалямі, пераходным кубкам і грашовым прызам аддзела фізічнай культуры спорту і турызму райвыканкама. Прыз лепшага іграка турніру атрымаў Уладзімір Коршунаў з першай каманды ліцэя.
НА БАРЦОЎСКІХ ДЫВАНАХ
У Брэсце прайшоў чэмпіянат Беларусі па вольнай барацьбе сярод юніёраў. У вагавай катэгорыі 84 кілаграмы трэцяе месца заняў на ім былы выхаванец Чэрвеньскай спартшколы Максім Казачонак.
5 навучэнцаў Чэрвеньскай СДЮШАР вызначыліся на абласной спартакіядзе па вольнай барацьбе ў Смалявічах. Першыя месцы занялі Аляксандра Захожая, Ягор Акуліч і Ерамей Сямко, другое — Аляксей Клімовіч, трэцяе — Дзмітрый Качаткоў.
НАПЕРАДЗЕ — ЯШЧЭ ПЯЦЬ ГУЛЬНЯЎ
У суботу чэрвеньскі «Будаўнік» правёў у спартыўнай зале «Мінск-Арэны» заключны матч першага этапу чэмпіянату Асацыяцыі аматарскага футбола Мінска па міні-футболу з камандай «Мінск Сіці». Гульня скончылася перамогай нашых футбалістаў — 13:8 (5 мячоў забіў Сяргей Канцур, 3 — Уладзімір Тарасік, 2 — Аляксей Сасункевіч, па аднаму — Сяргей Купровіч, Вячаслаў Целяціцкі і Віталь Мельцар).
Такім чынам, захапіўшы лідарства ў спаборніцтвах з першага тура, «Будаўнік» нікому яго не саступіў. На другім этапе шэсць мацнейшых каманд у гульнях паміж сабой прадоўжаць барацьбу за званне чэмпіёна. Усе набраныя ачкі застаюцца.
СТАНОВІШЧА МАЦНЕЙШЫХ КАМАНД ПЕРАД ДРУГІМ ЭТАПАМ
Каманды Г В Н П М А
«Будаўнік» 17 14 1 2 128:59 43
«Б-12» 17 13 0 4 122:58 39
«Мінск Юніён» 17 12 1 4 131:85 37
«АграТэх» 17 12 0 5 108:59 36
«Мінск Гэлаксі» 17 11 2 4 154:112 35
«Лібертас» 17 10 1 6 137:100 31
Падборку спартыўных навін падрыхтаваў
Ігар АДАМОВІЧ.