Гаспадаркі Чэрвеньшчыны завяршаюць падрыхтоўку да веснавых палявых работ. Аб тым, што зроблена ў ААТ «Валевачы», распавёў «Раённаму весніку» дырэктар гаспадаркі Пётр Малахаў:
— На лінейку гатоўнасці пастаўлена амаль дваццаць адзінак пасяўной і глебаапрацоўчай тэхнікі. Таксама маем высокі працэнт падрыхтаванасці трактароў. Пераважную большасць прычапных агрэгатаў адрамантавалі самі механізатары, якія за імі замацаваныя. Паспяховаму выкананню ўзнаўленчых работ паспрыялі стымулюючыя ўмовы аплаты працы за тэрміны і якасць рамонту.
Гатовыя да сяўбы ўсе тры нашы камбінаваныя пасяўныя агрэгаты. Іх магутнасці дастаткова, каб засяваць 100 гектараў зерневых у дзень і завяршыць яравую сяўбу за два тыдні. Тым больш, што зябліва мы ўзаралі з восені ў поўным аб’ёме.
Каб эканомна і эфектыўна расходаваць каштоўныя мінеральныя ўгнаенні, замяняем тэхніку, якая ўжо не адпавядае сучасным патрабаванням да якасці выканання работ. Летась набылі РУМ і самаходны энергетычны сродак «Раса» для падкормкі азімых, да гэтай пасяўной — новую машыну для ўнясення мінеральных угнаенняў фірмы «Амазонія».
Насенне падрыхтавалі на 100 працэнтаў. Зараз актыўна назапашваем мінеральныя ўгнаенні. На іх набыццё выдаткавалі каля 100 мільёнаў рублёў уласных сродкаў.
Паклапаціліся мы і пра ўмовы для механізатараў, слесараў. У майстэрні адрамантавалі душавы пакой, а таксама бытавое памяшканне, якое абставілі новай мэбляй. Так што нашым сейбітам будзе дзе пераапрануцца, адпачыць, памыцца. Мяркую, што гэта паспрыяе іх добраму настрою на пасяўную.
Занатаваў
Ігар АДАМОВІЧ.
Фота аўтара