“Медпрэпараты” (Нясвіж) – “Колас” (Чэрвень) – 1:0
Нясвіж. Стадыён райаграсервіса. 22 чэрвеня. Пераменная воблачнасць. 24 градусы. 50 гледачоў.
«Колас»: Курыловіч, Палтаржыцкі, Качановіч, Камісаранка, Прытыка, Жданок, Трапашка (Сасункевіч, 46), Суша, Канцур, Свірыдовіч, Добыш (Аладка, 80).
Так склаўся футбольны каляндар, што сапернікі сустрэліся паміж сабою другі раз за гэты месяц. У пачатку чэрвеня «Колас» прымаў «Медпрэпараты» на сваім полі ў рамках чэмпіянату вобласці. І саступіў — 1:3.
Кубкавы матч ў Нясвіжы праходзіў у роўнай барацьбе з аднолькавымі шанцамі на поспех. Нашы футбалісты, асабліва ў першым тайме, вельмі надзейна згулялі ў абароне. Былі магчымасці і забіць. У прыватнасці, прыцэльны ўдар Дзяніса Добыша прыняла стойка варот. Са штрафнога ў выкананні Сяргея Канцура мяч ляцеў дакладна ў левую «дзевятку», але ад немінучага гола «Медпрэпараты» выратаваў варатар. Нулявая нічыя, да якой усё ішло, была б на карысць чэрвеньцаў. Аднак за тры хвіліны да заканчэння матча гаспадары поля здолелі забіць адзіны ў гэтай гульні гол і перамагчы.Зрэшты, для «Коласа» ў гэтым супрацьстаянні яшчэ нічога не згублена. Каб прайсці ў чвэрцьфінал, нашым землякам неабходна ў паўторным матчы на сваім полі перамагчы нясвіжскую каманду з розніцай у два мячы. У выпадку, калі чэрвеньцы выйграюць у асноўны час з лікам 1:0, будзе прызначаны дадатковы час, а пры неабходнасці давядзецца прабіваць пенальці.
Ігар АДАМОВІЧ