І інфармаванне, і адказы на пытанне
У чацвер, які вызначаны Днём штомесячнага інфармавання насельніцтва, да працаўнікоў раённага камбіната бытавога абслугоўвання наведаліся старшыня камітэта па сельскай гаспадарцы Мінскага аблвыканкама Іван Шматко і старшыня Чэрвеньскага раённага выканаўчага камітэта Іван Муха.
Прыязна сустрэлі ў калектыве гэтых прадстаўнікоў улады. Іван Шматко ў сваім выступленні на добра знаёмых прысутным пераканаўчых фактах засведчыў тэму Дня інфармавання: “Беларусь — сацыяльная дзяржава: асноўныя вынікі развіцця на працягу 2006 -2010 гадоў”. Пры гэтым ён не абмінаў і праблемы, якія мелі месца.
Даходліва акрэсліў выступоўца далейшыя арыенціры і прыярытэты палітыкі нашай дзяржавы, якія вызначаны Праграмай сацыяльна-эканамічнага развіцця Беларусі на 2011-2015 гады. Асабліва падрабязна спыніўся на сельскай гаспадарцы.
Аб здабытках і перспектывах Чэрвеньшчыны расказаў Іван Муха. Удзельнікі сустрэчы звярнуліся да яго з набалелымі пытаннямі. У пераважнай большасці гэта датычыла спрэчных унутрыкалектыўных спраў.
У адкрытай размове разам з тымі, хто задаваў пытанні, кіраўнік раёна даў сваю ацэнку пачутаму, выказаў меркаванне як палепшыць сітуацыю. Канчатковае рашэнне будзе прынята пасля дэталёвага вывучэння становішча спраў створанай для гэтага камісіяй.
Аляксандр БУШЭНКА