Аб гэтым заявіў 22 снежня старшыня Савета Рэспублікі Нацыянальнага сходу Беларусі Анатоль Рубінаў на заключным пасяджэнні сесіі. Ён адзначыў, што галоўная задача дзяржавы — стварыць умовы, пры якіх чалавек мог бы ў найбольшай ступені праявіць свае здольнасці. Паводле яго слоў, неабходна паклапаціцца аб умацаванні ролі мясцовых Саветаў, і асабліва аб далейшым развіцці грамадзянскай супольнасці. У краіне функцыянуюць больш як 2 тыс. грамадскіх арганізацый і аб’яднанняў, 15 палітычных партый. «Аднак большасць партый мае не проста апазіцыйны, а варожа апазіцыйны характар і адлюстроўвае погляды вельмі невялікай радыкальна настроенай часткі насельніцтва», — сказаў спікер.
Паводле яго слоў, неабходна ствараць палітычныя партыі, якія адлюстроўваюць імкненні народа і прытрымліваюцца канструктыўных прынцыпаў. «Безумоўна, павінны мець магчымасць для выказвання сваіх пазіцый і апазіцыйныя партыі. Без крытыкі і альтэрнатыўных меркаванняў грамадства паспяхова развівацца не можа. Але ў аснове дзейнасці такіх партый павінна быць няўхільнае выкананне Канстытуцыі, павага да законаў і высокая палітычная культура», — заявіў старшыня Савета Рэспублікі. «Наш народ па-ранейшаму адзіны, ён станоўча ацэньвае дасягнутыя ў грамадстве вынікі і падтрымлівае курс на далейшае эвалюцыйнае развіццё краіны», — адзначыў спікер.
Разам з тым, лічыць Анатоль Рубінаў, выбары паказалі, што ў часткі грамадства недастаткова развіта палітычная культура. «Нас, як заканадаўцаў, не можа не абураць палітычнае хуліганства, якое было арганізавана некаторымі з былых кандыдатаў у прэзідэнты каля Дома ўрада», — падкрэсліў ён. Анатоль Рубінаў лічыць, што неабходна зрабіць правільныя вывады і ўзмацніць работу з моладдзю.
БелТА
