Нягледзячы на мароз, гэтымі днямі ў раёным ваенкамаце «горача», бо ў поўным разгары зімовая прызыўная кампанія. І хоць у войска хлопцы паедуць толькі ў сярэдзіне наступнага месяца, у ваенкамат яны цяпер наведваюцца часта. З імі сустракаюцца прадстаўнікі розных воінскіх часцей, «купцы», як іх называюць у арміі. Яны распытваюць у прызыўнікоў пра тое, у якіх войсках жадаюць служыць, пра іх здольнасці, цікавяцца станам здароўя і фізічнай падрыхтоўкай.
Часцей за іншых у Чэрвень наведваюцца прадстаўнікі воінскіх часцей з Барысава і Мінска. Тлумачаць яны гэта тым, што заўсёды вельмі задаволена службай юнакоў з Чэрвеньшчыны. Бо яны дысцыплінаваныя і кемлівыя, добрасумленныя і старанныя.
Падчас зімовай прызыўной кампаніі на службу ў войска з нашага раёна прызваны каля сарака чалавек. Амаль усе яны патрапяць у мінскія і барысаўскія воінскія фарміраванні. Служыць нашы землякі будуць ва ўнутраных войсках МВД, мотастралковых, танкавых часцях і войсках сувязі.
Як адзначыла начальнік аддзялення прызыву раённага ваенкамата Алеся ЯФІМІК, прыемна, што амаль усе чэрвеньскія прызыўнікі ідуць у армію ахвотна, не шукаюць шляхоў да «адступлення». Пра тое, як прайшоў святочны Дзень прызыўніка, чытайце у наступных нумарах «раёнкі».
